UMQEQESHI WOSUTHU UTHI KABAZIBONI BEYA EHLATHINI
USHAYA phansi ngonyawo ugcizelela eyokuthi AmaZulu FC ngeke alubhade ehlathini uCavin Johnson ongumqeqeshi wale kilabhu etalajwe kanzima yiCape Town City ngo-3-0 koweAbsa Premiership ngoMgqibelo ebusuku eCape Town Stadium.
UJohnson utshele ILANGA izolo ngeSonto ukuthi nakuba beguqiswe kabuhlungu yiCity kodwa uyabethemba abadlali bakhe ukuthi bazosiguqula ngokushesha isimo ababhekene naso, ikilabhu isuke emsileni lapho ihlezi khona ngamaphuzu amathathu nje kuphela emidlalweni engu-9.
USuthu lukulesi simo esibi nje, yingoba iFifa yahhundula amaphuzu alo angu-6 emuva kokuba lugoloze ukukhokha inhlawulo ngokuxosha umdlali waseNamibia, uPhineas Nambandi ngokungemthetho. Lugobile uphondo emuva kokudlelwa amaphuzu, lwayikhokha le mali kodwa umonakalo sewenzekile.
“Sizosuka ngokushesha emsileni we- log. Abantu bangasahluleli ngomdlalo weCity. Sibe nosuku olubi. Siye kulo mdlalo abadlali ngibadonse ngendlebe ngendlela yokuwudlala. Nokho sizokulwa kuze sifike ekugcine- ni. Ngiyabethemba abadlali bami. Sizokwazi ukuguqula lesi simo esikusona,” kusho uJohnson.
Ugcizelele eyokuthi ngeke nangengozi bagencwe yizembe. Uthi kumele abalandeli bangabi novalo, izinto zisazojika.
“Abadlali bayakwazi okubamele, ukuguqula lesi simo esikusona. Miningi kakhulu imidlalo esisazoyigijima ngakho-ke kangikabi nexhala. Nokho kumele siqale siqoqe amaphuzu agcwele emidlalweni ezayo,” kusho uJohnson.
Emdlalweni olandelayo weligi, uSuthu luzovovana inkani nePolokwane City mhla ka-11 kuLwezi (November) eKing Zwelithini Stadium, eMlazi.
Ngempelasonto esiya kuyona kuzodlalwa imidlalo yamaquarter-final eTelkom Knockout kanti uSuthu luzobhekana neOrlando Pirates eThekwini.