UDLALISWE EGULA UKAPUTENI WE-REAL KINGS
UDLALISWE egula umdlali weReal Kings FC ecazelane amaphuzu neRichards Bay FC kuba ngu-1-1 koweNational First Division (NFD) ngoMgqibelo ntambama eSugar Ray Xulu Stadium, eClermont.
IKings yiyona ebone imbobo yepali kuqala uThobani Kunene elibeka enethini, kodwa lacinywa ngelikaLionel Saal. UKyle Davies odlala emuva kwiKings, ophinde abe ngukaputeni wayo, ugijime lo mdlalo egula. Kuthiwa uvuke ekhempini intamo isinda engakwazi ngisho ukuyiphendula. Ugijime lo mdlalo egwinye amaphilisi ezinhlungu.
USimo “Govuza” Dladla ongumqeqeshi weKings, uthi kubalimazile ukugulelwa yilo mdlali.
“Indlela abedlala ngayo ohlangothini bekungeyona ajwayele ukudlala ngayo, ubengashosheli, ubegcina ngokumaka nje kuphela.
Kodwa-ke umdlalo siwuyeke thina ngesiwombe sokuqala kwazise siwatholile amathuba kodwa kasaze sawasebenzisa. Ngikhathazekile ngesimo sekilabhu, kufanele sisuke kule ndawo embi esikuyona,” kusho uDladla.
UBrandon Trutter ololonga iBay, uthi baziyekele lo mdlalo.
“Ngikholwa wukuthi besingcono kunabo ngayo yonke into. Bekufanele siwunqobe lo mdlalo ikakhulukazi ngesiwombe sesibili.
Kodwa-ke ngijabule ngephuzu esilitholile. Siyaqala ukuthola iphuzu ekuhambeni selokhu kuqale isizini yingakho lingijabulisa,” kusho uTrutter.
Isiyonke imiphumela yemidlalo yeNFD imi kanjena:- Cape Umoya Utd 0, Royal Eagles 1; TS Galaxy 1, Maccabi 0; Pretoria University 2, Ubuntu Cape Town 0; Stellenbosch FC 1, Tshakhuma Tsha Madzivhandila FC 1; Mbombela United 2, Jomo Cosmos 0; Real Kings 1, Richards Bay 1; Witbank Spurs 0, TS Sporting 0; UThongathi FC 1, Ajax Cape Town 0.