Utaxwe ngamaphoyisa kulahleka iloli
Abemsola ngokuthi nguyena olebile walidayisa
UYAVEVA owesilisa waseNtuzuma othi unenebulwe ngamaphoyisa ngemvubu ngoLwesihlanu olwedlule emuva kokuba kulahleke iloli lakwaKIA, lomphathi wakhe, ebelishayelwa nguyena kanti lizophelelwa wuphethiloli esendleleni esuka eSiphingo eyobeka intombi yakhe eNtuzuma emasontweni ambalwa adlule.
UMnu Sanele Khumalo (25), uthi le moto uyimise eduze komgwaqo wahamba nentombi eya egalaji eyothenga uphethiloli, okuthe uma esebuyela kuyona, wafika ingasekho.
Uthi ngoLwesihlanu ubekwenye indawo yokudlela eNtuzuma, kwafika izimoto ezintathu kukhona umphathi wakhe nabanye besilisa abathathu, behambisana nemoto yamaphoyisa.
Bambizele emotweni bathi makachazele amaphoyisa ukuthi imoto uyidayisele bani. Uthi ubaphendulile wathi imoto akayazi. Baqalile bamshaya ngezimpama, bamfaka emotweni, kwahanjwa naye wayiswa enkundleni yezemidlalo eGugulabasha ngabo8 ebusuku.
Uthi ufike lapho iphoyisa lesifazane lamfutha ngesisi esikhalisayo, lamkhahlela umphambili wawa phansi maqede watalajwa ngemvubu waze waquleka.
Uqhuba athi uthelwe ngamanzi waphaphama, baqhubeka lapho bebegcine khona, emuva kwalokho bamthatha baya naye kumngani wakhe, KwaMashu - nakhona besayobuza ukuthi iphi imoto.
“Ibuhlungu into engehlele, ngakhelwe uzungu ngumuntu ebengimsebenzela ebesengimthatha njengelungu lomndeni, ngisebenza engangiholeli ngisho isenti.
"Ungibizele amaphoyisa ukuba azongishaya ngoba nakhu engisola ngokuthi ngintshontshe imoto yakhe ngayidayisa. Ngimchazelile ukuthi kwenzekeni kodwa wangangilalela,” kusho uMnu Khumalo.
Uthi ubesaba ngisho ukuyovula icala ngoba usatshiswe ngokuthi uma nje eke wakwenza lokho, uzozibona ukuthi ufana nobani.
“Nginikwe isikhathi esingangosuku ukuba ngikhiphe imoto elahlekile, kwathiwa uma kungenzeki lokho, kumele ngizihenge ngizibulale ngoba bazobuya,” kusho uMnu Khumalo.
Okhulumela amaphoyisa KwaZulu-Natal, uLt Colonel Thulani Zwane, uthe: “Icala lokushaya ngenhloso yokulimaza kanzima livuliwe esiteshini samaphoyisa eNtuzuma ngemuva kokushaywa kulinyazwe umlisa oneminyaka yobudala engu-25.
"Icala lidluliselwe kwi-IPID ukuze iphenye.”
Okhulumela i-IPID, uMnu Moses Dlamini, uthe: “Uma icala lifanelekile ukuba liphenywe yithina, sizoliphenya.”