Ikhansela "eliqambe amanga" lisenkingeni
Bafuna kugezwe igama le-DA kulolu daba
LIZOCETSHWA kusomlomo kaMasipala weTheku ukuba alithathele izinyathelo ikhansela le-ANC ku- ward 13, okuvela ukuthi litshele amalungu ebandla lamaNazaretha ukuthi ikhansela leDA liphakamise ukuba kudilizwe ithempeli lalo eThornwood, eMariannhill.
Kusuke isidumo ngoMandulo (September) izisebenzi zikamasipala zidiliza isakhiwo seVukani Temple - engaphansi kohlangothi lwamaNazaretha aseBuhleni, aholwa yiNkosi Mduduzi Shembe - okuthe uma amalungu alo eyobuza ekhanseleni lendawo, uMnu Reginald Cloete, lawakhomba kwelimele iDA, uNkz Marlaine Nair.
Ekhuluma neLANGA uSihlalo weNazareth Judicial Council, uMnu Wellington Myeni, uthe le ndawo abadilizelwe kuyona ithempeli, sekuneminyaka bekhonzela kuyona, benesivumelwano somlomo nomasipala sokuba bayisebenzise ukwenza umsebenzi weNkosi.
Uthi ngemuva kokuba abakwamasipala bedilize ithempeli labo, banikele kuMnu Cloete beyobuza ukuthi lidilizelweni ekubeni bebenesivumelwano nomasipala, wabatshela ukuthi yena akazi lutho ngalokhu.
“Ikhansela lisikhombe kweleDA, uNkz Marlaine Nair, lathi masiye kulona kungenzeka ukuthi yilona elikhiphe umyalelo wokuba sidilizelwe ithempeli. Lithe bona njenge-ANC kabawadilizeli amabandla, kunalokhu bayawaxhasa,” kusho uMnu Myeni.
NgoLwesibili uNkz Nair ukhiphe isitatimende ezihlangula kulokhu, ethi ithimba le- intergrity and investigation kumasipala kumele liphenye ukuze kutholakale ukuthi ngubani okhiphe umyalelo wokuba kudilizwe lesi sakhiwo.
Esitatimendeni, uthi uthintwe nguMnu Myeni ebuza ngokudilizwa kwethempeli labo, wabazisa ukuthi yena akazani nalokho. “Ithimba leDA elihlanganisa usotswebhu wekhokhasi, uMnu Thabani Mthethwa noMnu Emmanuel Mhlongo, lihlanganile nobuholi bebandla lamaNazaretha labutshela ukuthi kasazani nokudilizwa kwethempeli.
"Lokhu okushiwo ngathi yizenzo zokungcolisa igama leDA nokungcolisa ubudlelwano esinabo naleli bandla,” kusho uNkz Nair.
Uthi benze konke okusemandleni ukusiza amalungu aleli bandla njengoba baze bawaxhumanisa nehhovisi likamasipala elibhekelele ukudilizwa kwezakhiwo ezingekho emthethweni.
“Kuleli hhovisi nakhona bathe kabazi ukuthi umyalelo ukhishwe ngubani, bathi uma kunezikhalo kufanele kubhalwe incwadi ukuze kuzokwenziwa uphenyo," kusho yena. Bakwenzile lokho, kumanje balinde ukuzwa ukuthi luhamba kanjani uphenyo.
UMnu Zwakele Mncwango ongumholi weDA KwaZuluNatal, uthe bazocela usomlomo weTheku, uMnu William Mapena ukuba ashushise uMnu Cloete ngoba le nto ayenzile eqambela ikhansela labo amanga, iwukuqhatha umphakathi nokuwedukisa ngento ebucayi, okuyinkolo.
Uthe UNkz Nair uyasebenzisana namaNazaretha kule ndawo, wathi uma kuwukuthi kabasizakali uma belandela imigudu kamasipala, udaba lungagcina luphelele enkantolo ngoba kufanele kugezwe igama lekhansela labo.
"Ikhansela (uMnu Cloete) kuzomele liveze ubufakazi bokuthi uMarlaine nguyena oholele ekubeni kudilizwe isakhiwo. Amanga yinto embi kabi njengoba isimo sezepolitiki sinjena nje KwaZulu-Natal," kusho yena.
UMnu Cloete uthe njengoba amaNazaretha udaba eselwedlulisele ku-Ombudsman, ngeke esakwazi ukukhuluma ngalo.
“Kimina sekufana nokuthi udaba lusenkantolo, kakuselula ukuba ngiphawule, ngicela nithinte uphiko lwakwaLand Invasion,” kusho uMnu Cloete.
Okhulumela uMasipala weTheku, uMnu Msawakhe Mayisela, uthe abakwaLand Invasion badilize lesi sakhiwo ngoba besakhiwe endaweni kamasipala ngokungemthetho.
“Ziningi izakhiwo esesithole ukuthi zakhiwe ngokungekho emthethweni. Sizokwenza konke okusemandleni ukuvikela amalungelo ezakhamizi nosomabhizinisi abagcina sebempintshwa yizakhiwo ezingekho emthethweni eduze kwemizi yabo.
"Siwumasipala onakekelayo, ngakho-ke ngeke sivumele noma ngubani azenzele umathanda. Sinxusa nomphakathi ukuba usebenzisane nathi ubike abantu abazithathela umhlaba ngaphandle kwemvume ngokushayela kulezi zinombolo:031 311 4699 /079 821 8879.