ENYE INCWADI NGO-ISAIAH SHEMBE
KUNXUSWE abantu ukuba bagweme ukugxeka into abangenalo ulwazi lwayo ngesikhathi kwethulwa incwadi ekhuluma ngomsunguli webandla lamaNazaretha, uMphrofethi Isaiah Shembe, ngoLwesibili eCity Hall, eThekwini.
Le ncwadi ethi, “The Massenger of God: Sacred Tales of Prophet Isaiah Shembe‚” ibhalwe nguMfu Mthembeni Mpanza ongumholi weNew Nazareth Baptist Church.
Ekhuluma kulo mcimbi uMnu Jabulani Gumede, wenkampani eshicilele le ncwadi, uthe uyakholwa wukuthi uJesu Krestu noShembe bamunye.
Uthe abantu mabagweme ukugxeka lokho abangenalwazi ngakho, wathi uyisemkhulu kaMphrofethi u-Isaiah kwabe kunguMzazela wakwaKhumalo, isibongo sakwaShembe savela ngezizathu zokuphepha ngenxa yezimo ezazikhona ngaleso sikhathi.
Ukhulume nangomsuka wegama lendawo amaNazaretha ayazi kakhulu, ebizwa ngokuthi kuseMkhayideni, ngaseRichards Bay, wathi leli gama lakhiwe ngamagama amabili: elengilosi enkulu, uMichael, nelendawo okuthiwa yiEden, uShembe “akuboniswa ngesikhathi esezulwini”.
UMfu Mpanza uthe incwadi iyatholakala ngesiNgisi ukuze ifinyelele kubantu abaningi, babe nokuqonda ngenkolo yobuNazaretha, futhi kulungiswe amaphutha enziwa ngabalobi abamhlophe, ababebuye bawuhlanekezele umlando ngenxa yokungabi nolwazi ngoShembe.
Uveze nokuthi kunomsebenzi abaphezu kwawo wokuba kube nefilimu exoxa ngoMphrofethi u-Isaiah Shembe, ezoqoshwa ngabantu abanesigqi nabahlonishwayo endimeni yokuqopha amafilimu.