Kuhlawuliswe indoda umkayo 'ethuka' abantu
Ubabize ngaphansi kweziketi zonina
UHLAWULISWE izinkomo ezimbili no-R6 437 owesilisa waseNgonyameni, eNgwavuma, olahlwe yicala lokwehluleka wukuyala inkosikazi yakhe echaphe ngenhlamba amadoda ezigodi ezimbili, yawabiza ngaphansi kweziketi zamakhosikazi awo nonina.
UMnu Bongi “Sgwalaza” Mathenjwa, uhlawuliswe ngesenzo somkakhe, uNkk Nomathemba MathebulaMathenjwa, oshiye angalazi emhlanganweni obungeSonto enkundleni yezemidlalo, kuMcansa, eNgonyameni.
Indaba isuke emuva kokuba induna yaseNgonyameni, kwesakwaMngomezulu, uMnu Elias Shongwe, ngokubambisana noMnu Abraham Mabuyakhulu, oyinduna yaseMabomvini kwesakwaMathenjwa, benxuse ukuba kuvalwe izindlu zamasonto kuyodingidwa udaba lokulahleka kwemfuyo kulezi zigodi, ikakhulukazi izimbuzi.
Lo mhlangano ophuthumayo ubizwe ngenxa yophenyo lweCommunity Policing Forum (CPF) oluveze ukuthi indodana kaNkk Mathebula-Mathenjwa, uNdumiso Mathenjwa (18), ingomunye wabasolwa ekushushumbiseni izimbuzi, okunenkolelo yokuthi ziyabuthwa enyakatho-mpumalanga yeKwaZulu-Natal ngenxa yamanani ezithengwa ngawo.
UNdumiso ubanjiwe nomngani wakhe, onguMfutho Mathenjwa (19), okuthe besashushiswa enkantolo yasehlathini, kwatheleka iqulu elingobhululu babo lihlomile, labathatha ngenkani.
Kuthiwa bathathwe sebevele belihlanze lonke iqiniso, badalula zonke izimboni abazithengisela imfuyo. Baveze namagama abanumzane abahlonishwayo emphakathini, bathi basebenzisana nabo ekuntshontsheni imfuyo.
Emhlanganweni obungeSonto, kuthe uma kubonakala emini ukuthi kabafuni ukuqhubeka nokukhipha iqiniso, kwanxuswa abesifazane ukuba bakhululeke babuyele emakhaya, kusale amadoda.
Kulapho uNkk Mathebula-Mathenjwa edazuluke khona, wanxusa indodana yakhe ukuba imlandele bagoduke kodwa yamtshela ukuthi makakhululeke akukho azokwenziwa khona. Kunalokho ukhale kakhulu, waqala ukuchapha abantu ngenhlamba.
“Ngithi asimuke mntanami! Ungabe ulokhu udlala la mago.. lapha, amale.. angamasela nawo. Sebesizakala ngawe mfana wami, masihambe siye ekhaya. Ngeke zikwenze lutho lezi zinto ezingenamsebenzi walutho. Amago.. lawa,” kusho uNkk Mathebula-Mathenjwa.
Kube nokuhhomuzela abantu befuna ukumudla luhlaza bethi ubehlisa isithunzi. Kusize iphoyisa lenduna, uMnu Mhlabunzima Gumbi, elicele umphakathi ukuba wehlise umoya.
Ngemuva kokuba sebehambile abesifazane, uNdumiso noMfutho bacele ukunikwa ithuba elanele lokuchaza ngezigameko zabo maqede balanda nezinye izinto abazintshontsha ezitolo zamalungu omphakathi waseBomvini naseNgonini, okubalwa izikhwama namabhodlela obhiya.
Baqede lapho bacela uxolo ngokuba wuhlupho emphakathini.
Badalule igama likaMnu Nkosiyethu Mngomezulu, bathi baqhuba naye umkhuba wokuntshontsha imfuyo kulezi zigodi.
Naye ulandiwe yiCPF ngoMsombuluko.
NgoLwesibili sekubizwe umphakathi, akahluphanga naye njengoba evele walikhuluma linjengoba linjalo iqiniso. Kulapho kuhlawuliswe khona umndeni wakwaMathenjwa, yize ibingekho inkosikazi yakhona.
UMnu Mathenjwa usamukele lesi sigwebo esimenyezelwe nguMnu Elliott Mngomezulu ongowasendlunkulu yakwaMngomezulu. Unikwe izinsuku eziwu-14 ukuba akhokhe le nhlawulo.
UMnu Mngomezulu uthe eyodwa yalezi zinkomo ezimbili ahlawuliswe zona uMnu Mathenjwa, izohanjiswa ebukhosini bakwaMathenjwa eyodwa iye kwaMngomezulu.