Kusolwa umndeni ngokufa komculi
Udutshulwe wabulawa ephuma emngcwabeni womfowabo
KUSOLWA ingxabano yomndeni mayelana nokudutshulwa kubulawe umculi wombhaqanga, uSandile Khwela, oshone ngeSonto.
Ngokuthola kweLANGA ngemithombo yalo, kunokungaboni ngaso linye emndenini njengoba kuyona le nyanga kwenzeke isigameko esifanayo kubulawa umfowabo obeyiphoyisa esiteshini saseMariannridge, eMariannhill.
UKhwela udutshulwe ngeSonto ntambama ebuya KwaNdengezi emngcwabeni womfowabo, onguWarrant Officer Bhekisigcino Zethembe Khwela (54), ILANGA elibikile ngokubulawa kwakhe esemzini wakhe.
Ngokusho komunye umthombo obusondelene kakhulu nalo mculi, ubengenazo izitha kodwa bekuno- kungaboni ngaso linye emndenini wakubo njengoba selokhu uqalile unyaka, ayadutshulwa amalungu awo.
“Bekunezinkinga eziningi abekhala ngazo kubo futhi esho nokuthi naye akaziboni ephephile ngoba kunomkhankaso omubi, odlangile kubantu bomndeni wakhe. Bengingazi-ke ukuthi naye usengaze abulawe njengoba ubeyindoda ezithulelayo, engezwani nokukhuluma,” kusho umthombo.
Lo mculi ungeniswe egunjini labagula kakhulu emuva kokudutshulwa.
Uthintwa umndeni wakhe, ucele ukuba kuxhunyanwe noMnu Nhlanhla Mtaka okuthiwe nguyena owukhulumelayo .
UMnu Mtaka ngokwesitatimende asithumelele uthe: “Siwumndeni silahlekelwe ngumuntu ongazange alifulathele ikhaya enayo indlela nezizathu ezazingamenza enze njalo.
“Umsebenzi wakhe ubumhambisa amagumbi amane omhlaba lapho abengahlala khona aphephe, anethezeke nabantwana bakhe. Nokho lokho akakwenzanga ngoba imvelaphi yakhe ibibalulekile kuye.
“Ukufa kumzume enakekela abakwabo abebesosizini lokufelwa. Kuncane nokho esingabe sisakusho ngaphandle kokuthi siwumndeni sishayeke udume olungenqiwa ntwala. Obethu ubuhlungu sibuzwela manje ngoba siyayazi imisebenzi yale nsizwa yethu emphakathini waseNingizimu Afrika nasemhlabeni jikelele. Ukuhamba kukaSandile yima kusazozwela ngoba abanjengaye akubona abansuku zonke.”
Ebuzwa ngezinsolo zokuthi ukushona kwalo mculi kumayelana nezingxabano zomndeni, uthe akukho akwaziyo ngalokho, wathi akubhalwe okusesitatimendeni.
UKhwela uzofihlwa ngoMgqibelo eShongweni Dam emuva kwenkonzo ezokuba seMariannridge Hall ngo-9 ekuseni. Wazakhela kakhulu igama elihle esebenza neqembu loMbhaqanga, iMadlala Brothers.
Uhlomule ngezindondo kwiSouth African Traditional Music Achievements Awards (Satma) eguqisa amanye amaciko ombhaqanga.
Okhulumela amaphoyisa KwaZulu-Natal, uLt Colonel Thulani Zwane, uthe kuvulwe icala lokubulala nelokuzama ukubulala esiteshini samaphoyisa KwaNdengezi kodwa akukaboshwa muntu.
mthobisis@ilanganews.co.za.