U-BENJAMIN DUBE UGONYULUKA NGOKUMHLUKUMEZILE
UMAKADEBONA emculweni wegospel, uBenjamin Dube ( osesithombeni), ugonyuluke okokuqala mayelana nengoma okubikwe emithonjeni eyahlukene yabezindaba ukuthi uyebile.
UDube, ongomunye wabaculi abahlonishwayo kwi- gospel, kuzokhumbuleka ukuthi kuke kwasuka umsindo phakathi kwakhe noBrenda Mtambo mayelana nengoma ethi, “He Keeps On Doing Great Things”.
U-Brenda ukhale ngokuthi uDube usebenzise indlela yakhe ukucula le ngoma ngaphandle kokumazisa. Emithonjeni yabezindaba ebishicilela lolu daba, uDube ubengatholakali ukuze aphawule ngale ngoma.
Echaza okokuqala, uvumile ukuthi indlela ayicula ngayo le ngoma iyafana nekaBrenda ethi, “Ungenzela Konke Okuhle” kodwa akusho ukuthi ngeyakhe (uBrenda).
“Le ngoma iyaculwa emabandleni ahlukene njengoba uBrenda eyicula ngesiZulu ethi, “Ungenzela Konke Okuhle‚” Akuyona eyakhe kodwa yingoma ekhona eculwayo ezindaweni ezahlukene,” kusho uDube.
Uthi okubuhlungu wukuthi ngesikhathi uBrenda enezikhalo ngale ngoma, akazange amqonde kodwa ubabele ezinkundleni zokuxhumana.
“Ngangilindele ukuba eze kimina uma kukhona akubona ngikuntshontshile. Ngokwami, akukho okuphambene engakwenza ngoba ingoma iyaziwa futhi indala. Ukuthi siyicula ngokufana, akusho ukuthi kukhona osentshontshele omunye,” kusho lo mculi eveza nokuthi ngaphambi kokuqopha le ngoma wabe ezimisele ngokusebenza naye uBrenda kodwa kwagcina kungenzekanga.
UDube, osebe kulo mkhakha iminyaka ewu-36, uthi phakathi kwezingqinamba aseke wahlangabezana nazo, kazikho ezidlula ukuhlukanisa kwakhe emishadweni emibili.
“Indlela lezi zigameko ezenzeke ngayo nangendlela ezibikwe ngayo, zingithikamezile kodwa ngakwazi ukufunda futhi ngavuka ngazithatha,” kusho yena.
Uthi nakuba wahlukanisa kodwa akukho azisola ngakho.
“Okwenzekile bekumele kwenzeke ngoba ezinye izinto azikho emandleni ethu emhlabeni, kodwa kusuke kunguNkulunkulu ethatha indawo yakhe,” kusho yena.
Lo mculi, oseke wahlabana ngenqwaba yezindondo, uncome iKwaZulu-Natal ngokukhulisa nangokuthuthukisa umculo we- gospel. Uncome ukuzimisela nangokunyusa izinga kwabaculi balesi sifundazwe kulolu hlobo lomculo.
“Ngendlela engibona ngayo, abaculi bakulesi sifundazwe bawuthathe bawubeka kwelinye izinga umculo we- gospel,” kusho uDube.
Uthi kuyajabulisa ukubona abantu abasha bengena futhi benza kahle kulolu hlobo lomculo ngoba isikhathi siyabadinga abantu abasha abasondelene noNkulunkulu. Uqhube wathi yingakho kwi-albhamu yeSpirit of Praise 7, ephume kulo nyaka, bebandisile abaculi abaqhamuka KwaZulu-Natal.
“Uma ubheka abaculi abafana noThinah (Zungu), uDumi (Mkokstad), u-Ayanda (Ntanzi) ngabaculi abenza kahle kakhulu, yingakho sikhethe ukuthi uma sesiqopha iSpirit of Praise sibabize babe yingxenye yethu,” kusho uDube enanela ngokuthi yingakho bekhethe ukuyonandisa eThekwini ngoMgqibelo.
“Ngiyafisa abantu baKwaZuluNatal baphume ngobuningi ukuzobona okokuqala iSpirit of Praise inandisa bukhoma. Sithembisa ubusuku bendumiso nevosho,” kusho yena.
Uveze ukuthi nakuba esebe kulo mkhakha iminyaka kodwa kuningi asazimisele ukukwenza kuwona.
Uthi ngonyaka ozayo uzoqopha iDVD ye-In His Presence, azimisele ukuhlanganisa kuyo abaculi base-Afrika nabaphesheya kwezilwandle.
“Sengiwaqalile amalungiselelo, abantu mabalindele into ezobabusisa futhi abazoyithokozela,” kusho uDube. Imizamo yokuthola uBrenda iphunzile, njengoba ubengatholakali ocingweni lwakhe.