Ibanga amahloni impesheni eLuthela
Lmali yempesheni etholwa ngabefundisi asebethathe umhlalaphansi kayenele ukondla umndeni
KUVELE amahlazo ngomholo wempesheni wabefundisi bebandla lamaLuthela KwaZuluNatal, okubikwa ukuthi abanye bahola u-R300 ngenyanga, akukhathalekile noma banemindeni engakanani.
Lokhu kuvele embuthanweni wengxenye yamakholwa aleli bandla obuKwaNzimela, eMelmoth, ngeSonto, emuva kokuba uMnu Falithenjwa Mkhize azise amalungu ebandla - alwa nobuholi obukhona njengamanje ngokuthi kabuhambisi kahle izinto, eMphumulo, KwaMaphumulo.
Lokhu kungenxa yenkinga ebhekene nebandla yokuthi liyakweleta esikhwameni sempesheni emuva kokunyamalala kuka-R40 million. UMnu Mkhize uthe kunababhishobhi nabefundisi ase- bethathe umhlalaphansi abahola imali 'kadekle' ewu-R1 000, okuyimali encane kakhulu engondla umuntu obesebenzela iNkosi iminyaka elinganiselwa ku-65.
“Sibhekene nesimo esinzima lapho abefundisi, omengameli nababhishobhi bethwala kanzima uma sebethathe umhlalaphansi ngenxa yokuthi ibandla liyakweleta esikhwameni sempesheni, okwenza ungakhushulwa umholo wabo wempesheni,” kusho uMnu Mkhize.
Wenze isibonelo ngoMbhishobhi Phembukuthula Buthelezi athe naye uhola leyo mbijana emuva komsebenzi onzima noncomekayo, awenzele ibandla lamaLuthela.
UMbhishobhi Buthelezi akabizwanga ngumuntu ukuba aye phambili, usukume inhlamvu wathi: “Ningaze ningabaze, mina njengoba ngisempeshenini nje, ngihola kangcono ngoba ngithola u-R1 270.62 ngenyanga, kunomengameli nabefundisi engibaziyo abahola u-R300 kuphela. Yisimo esinzima lesi. Ngicela sengathi kungasizwa nemindeni yomengameli nabefundisi abamiswe yihhovisi elikhulu eMphumulo, balekelelwe ngazo zonke izindlela.”
Ngenxa yalesi sicelo sikaMbhishobhi Buthelezi, kube nenguyazana emuva kwenkonzo lapho kudingidwe khona izindlela okungasizwa ngazo izinceku nezincekukazi esezidla endala. ILANGA lithole ngemithombo yalo ukuthi bekuhlangenwe komkhulu eMphumulo, isigungu sebandla nabefundisi kuyokhulunywa ngayo impesheni.
Isimo sisemuncu kuleli bandla elihlukene phakathi emuva kokumiswa emsebenzini kwabefundisi abaningi nomengameli, besolwa ngokuthi bayalixova.
Abamisiwe bathi bamiselwe ukuthi bafuna kube nobulungiswa kuleli bandla, bakhala nangoMfu Themba Kathi, ongunobhala omkhulu webandla, bathi usephelelwe yisikhathi, usewulungele umhlalaphansi. Phambilini ILANGA likhuluma noMfu Kathi, uthe laba abakhonondayo akabazi ukuthi bangobani ngokwebandla. knowledge.simelane@ilanganews. co.za