AYAVALWA AMABANDLA AZIMELE
KUKHONA okusina kujeqeza amabandla azimele njengoba kunemibiko ethi e-Angola kule nyanga uhulumeni wakhona ushaye umthetho onemibandela ewumqansa kwabafuna ukuba ngabefundisi phansi kohlelo lwamabandla azimele. Lokhu kuvele emazwini ommeli weFOR SA - okuyinhlangano emele izinkolo ezahlukene - u-Adv Nadene Badenhorst encwadini yale nhlangano ejikelezayo, eyikhiphe ngoLwesibili. Phakathi kokunye, le ncwadi ihlaba imikhuba kaMfu Timothy Omotoso ohola ibandla elibizwa ngeJesus Dominion International, okumanje ugqigqa eNkantolo eNkulu yasePort Elizabeth ngohide lwamacala athweswe wona okudlwengula nokushushumbisa abantu. U-Adv Badenhorst uthi umyalezo okule mibiko ucacile; uma amabandla aseNingizimu Afrika engazilawuli, aqondise izinto, “singazithola sisesimeni lapho uhulumeni uzosenzela lowo msebenzi”.
Kule ncwadi iFOR SA, ilincome kakhulu iqhaza leCRL Commission eholwa nguNkk Thoko Mkhwanazi-Xaluva, lokuveza obala imikhuba engemihle eyenzeka kwamanye amabandla, nokuphenya ibheshu kubazenzisi abagcwele emkhakheni wezenkolo
ILANGA libuza kuMnu Michael Swain, ongumqondisi weFOR SA, ukuthi angakanani amathuba okuba nakuleli sibone uhulumeni ulawula ukuqhutshwa komsebenzi wezenkolo, uthe njengamanje sekukhona okwenziwayo.
Ngokusho kwakhe bakwenza lokhu ukuze kube nomkhombandlela wokuziphatha ozobhekelela lokho, ohlelwa yiSouth African Charter for Religious Rights and Freedoms futhi owesekwayo wubuholi obumele abantu ababalelwa ku-25 000 000.
Wengeze ngokuthi inkululeko yezenkolo kayisoze yaba yizaba zokwenza izenzo ezingekho emthethweni, wathi lapho zibikwa khona izigameko eziphambene nenkolo, uhulumeni mawubophe, ushushise abathintekayo.
Ngokomthetho oshaywe e-Angola, sekuzoba ngabaneziqu zezenkolo zasenyuvesi abazovunyelwa ukusebenza njengabefundisi, futhi kumele amabandla abo abe namalungu awu-100 000 kuya phezulu. Abanamalungu angaphansi kwalesi sibalo amabandla abo azovalwa. Kube yileso naseRwanda ngasekuqaleni kwalo nyaka, okuholele ekuvalweni kwamasonto awu-6 000. Kuthiwa amabandla amaningi kula mazwe asehlangana ngomshoshaphansi ngoba ukwenza umkhuleko noma kuphi kakusavunyiwe, kumele wenziwe ezakhiweni ezivunywe wuhulumeni kuphela.