AYANDA BUTHELEZI
UTINYELIWE uThembisa Mdoda, ongumlingisi nomethuli wezinhlelo kumabonakude ngamazwi atolikwe njengawokudicilela phansi imisebenzi kasomabhizinisi omnyama esikhundleni sokumeseka ebhizinisini lakhe.
UMdoda ubephawula ngemikhiqizo yasekhishini kasomabhizinisi waseGoli, uZonke Ndaba obhale ekhasini lakhe leFacebook ememezela ukuthi uzokwethula uhlobo lwezitsha zasekhishini zekhethelo ngonyaka ozayo.
UZonke weZiyanda Appliances, okumanje kusabalele izithombe zempahla yakhe okuyi- toaster, yiketela, ne- mixer, umemezele ngoLwesithathu ukuthi ngonyaka ozayo uhlele ukwethula ngokusemthethweni uhlobo olusemgangathweni lwezitsha zasekhishini ezizoba sezingeni lomhlaba.
Esanda kufaka izithombe zomkhiqizo athi ngowezandla zakhe, unconywe kakhulu ngokuba ngusomabhizinisi omnyama ofike nokwahlukile futhi okusezingeni elicokeme.
Lezi zitsha ezakhiwe ngesitayela sesimanje zikhanga ngemibala egqame ngokunothile edlisa ngemi- dwebo yesiNdebele. Ngokwekhasi labo le-instagram, i-@ziyanda_appliances, intengo yeketela ingu-R5 500 kanti i- toaster ingu-R6 500. Emuva kwesikhashana uZonke efake izithombe ezihambisana nenani, ishintshile inkulumo abaningi baqala bazibuka ububanzi bamaphakethe abo kwezemali. USomahlaya uTrevor Gumbi uphawule wathi uma engazithenga izitsha zeZiyanda angazibeka kwiroom divider, ubuke kodwa ungathinti. Uthe ofuna ukwenza itiye noma ikhofi kungamele alinde yena aze abuye.” Kube sekuphawula uThembisa ethi uphoxekile uma ethola ukuthi le nkampani akusiyona eyomuntu omnyama kodwa ngekaMnu Rafael Pinto Maia, oyi- designer. Ube esetinyelwa ngokufuna ukugqama ngokubukela phansi amandla omuntu omnyama kunokumeseka.
Kuze kwalamula ozibiza ngoLungile Kunene ekhasini lakhe ocacisile ukuthi uMnu Pito Maia ubesebenzisana noZonke ukudweba imihlobiso yalo lo mkhiqizo.
Eziphendulela uZonke uthe iZiyanda inkampani yabantu abamnyama kuphela, ingxenye yayo engu-30% ngabesifazane.
Uthe umbono wayo ugqugquzelwe wuthando nokugcina isiko lobu-Afrika ngokulihlanganisa nomkhiqizo osemgangathweni futhi osezingeni lomhlaba ukuqhakambisa ubuhle ngezindlela ezahlukene.
“Ukucacisa ngokusebenzisana kwami noRafael, ngimthumele imidwebo yami ngamcela ukuba athasisele ngolwazi lwakhe olunzulu njengoba aziwa kakhulu kwi- industrial designing ngethemba lokuthi uzophinde angisize ngixhumane nabangathanda ukutshala imali ( investors) kuleli bhizinisi, kusho yena.”
Lokhu kufakazelwe nguPito Maia othe akasiyena umnikazi wale nkampani nomkhiqizo wayo kodwa ubecelwe nguZonke ukuba amsize nge- design kuphela.
UZonke uthe igama elithi Ziyanda liqhamuke ngesikhathi ezama ukuqhamuka negama - uhlanganise igama lakhe nesibongo. Ubonge labo ababeka umkhiqizo wakhe ezingeni elifana nelaleyo esemgangathweni yaphesheya, okubalwa iSMEG.
BAPHAWULA BATHINI? La manani awazikhulumi izilimi zaseNingizimu Afrika.
Awukwazi ukuthenga le mikhiqizo bese uzofaka kwitoaster isinkwa osithenge ko-' my friend.’ Udinga isinkwa saseWoolies.
Laba abaphawula ngamanani eZiyanda yi-bona kuqala abakhuluma kakhulu ngo-kungasekwa ngokwa-nele kosomabhizinisi bakuleli. Siyanibuka.
Omama bethu bebezithanda izinto ezinhle futhi imikhiqizo eminingi efana noTupperware no-AMC yama ngenxa yabo. Nathi sizoweseka uZiyanda, uzoma futhi uzokhula ngoba siyisizwe esesekanayo.