UMotsepe ucasulwa yizenzo ezimbi zikaJali
Usehlale ekwabezindaba ngezinto ezibhedayo
KUVELA ezithi udinwe uyaqhuma uPatrice Motsepe onguMengameli weMamelodi Sundowns yisenzo sika-Andile Jali ongumdlali wale kilabhu afuna ukuba athathelwe izinyathelo ngokushesha njengoba ekholwa wukuthi uhlambalaza isithunzi sakhe nesekilabhu ngokunjalo.
UJali, odlala esiswini kwiDowns, ukuphindile futhi lokho eboshwa ekuqaleni kwesonto ngezinsolo zokushaya nokulimaza impahla. Kuthiwa lesi sigameko senzeke kwakhe ngempelasonto eyedlule. Udedelwe ngebheyili ngoLwesibili icala lahlehliselwa umhla ka-5 kuZibandlela (December).
Leli phephandaba lihoshe ngemithombo yalo ukuthi ukungaziphathi kahle kukaJali nokuhlale ekwabezindaba ngezinto ezibhedayo kucasule uMotsepe okuthiwa usejube ithimba ngaphakathi ukuba kube khona elikwenzayo ngoJali. Kuthiwa into ecika du uMotsepe wukuthi leli cala asolwa ngalo lithinta ukuhlukunyezwa kowesifazane okuyinto angahambisani nayo futhi anemikhankaso yokuthi ingenziwa.
“Into ecika kakhulu umengameli wukuthi akukhona okokuqala ehlambalaza ikilabhu selokhu ebuye eBelgium, njengoba eke wamataniswa necala lokubanjwa eshayela ephuzile. Yinto ehlale ishunyayezwa njalo kwiDowns ukuziphatha kahle kwabadlali ngoba isithunzi sikamengameli nesekilabhu kufanele ngaso sonke isikhathi sihlale sivikelwa.
“Nakuba kungakacaci ukuthi kuzokwenzakalani ngaye kodwa umengameli usewukhiphile umyalelo wokuba ibhekwe indaba yakhe futhi ajeze ngayo ngaphandle kokuphazamiseka kophenyo lwamaphoyisa,” kusho umthombo waleli phephandaba ongaphakathi kwiDowns ocele ukuba lingadalulwa igama lawo.
Leli phephandaba lishayela uThulani “TT” Thuswa wezokuxhumana kwiDowns ngalolu daba, uthe ubenosuku olumatasa ngeke akwazi ukuphawula ngalo kungcono athunyelelwe umyalezo. Uwuthunyelelwe akangawuphendula kwaze kwashaya esokuloba.