OBEKWI-ARROWS UXWAYISA ABADLALI
UXWAYISA intsha ukuba ingahambi endleleni yakhe uMlungiseni Masinga owazakhela igama kwiLamontville Golden Arrows nakwiNathi Lions ngokwehlukana.
UMasinga uyingxenye yamaSalga anonyaka azokuba ngoZibandlela (December) eMgungundlovu.
Le midlalo iba minyaka yonke kanti idlalwa yiyona yonke imikhandlu yomasipala yaKwaZulu-Natal ewu-11. Kuzokube kuqhudelwana emidlalweni engu16 eyahlukene.
UMasinga uthe ucela intsha ukuba izimisele kwazise ingashintsha impilo yayo ngezemidlalo. Uthi yena ngabe ukude kakhulu empilweni ukuba wazimisela, wangagxila ezidakamizweni ezibulale ikusasa lakhe.
Uphethe ngokuthi uzokube eyingxenye yalo mqhudelwano ehambisana nabanye abadlali ukuzohlwaya ithalente njengoba esebenzisana namakilabhu amaningi akwi-Absa Premiership.
UNonhle Mkhulisi oyimeya yaseKing Cetshwayo Municipality, obemele usihlalo wamaSalga uMluleki Ndobe waseHarry Gwala, uthe balindele abadlali abangaphezulu kuka-5 000 abaphuma kuso sonke isifundazwe.
Phakathi kwemidlalo okuzokube kugaduliswana kuyona kubalwa ibhola lezinyawo kwabesilisa nakwabesifazane, elombhoxo, ikhilikithi, elomnqakiswano, ukubhukuda, ithenisi, ikarate, ezokugijima, isibhakela ukukha nje phezulu.
Omasipala besifundazwe abalindelekile eMgungundlovu, AmaJuba, iLembe, uMzinyathi, iHarry Gwala, Ugu, iTheku, iZululand, uMkhanyakude, iKing Cetshwayo noThukela.
IMeya yaseMgungundlovu, uThobekile Maphumulo, ithe sebemi ngomumo ukwamukela abadlali abazokuba yingxenye yalo mqhudelwano. Uthi uMgungundlovu unezinkundla ezisezingeni eliphezulu kanti enye yazo wuMsunduzi Athletics Stadium.