Sekulindwe isinqumo selezigwegwe ngoKG
Uvelile ekomidini
KULINDELEKE isinqumo esiwujuqu ngekusasa likaKagisho “KG” Dikgacoi obeyiphini likaRoger Sikhakhane ongumqeqeshi weRoyal Eagles ezovovana inkani neMaccabi FC ngoMgqibelo ngo15h30 eChatsworth Stadium, eThekwini.
UDikgacoi umiselwe ukuphula umthetho we-Eagles ngesikhathi sekhefu leFifa.
ILANGA lithole ukuthi uDikgacoi uvelile phambi kwekomidi eliqondisa izigwegwe le-Eagles ngoLwesibili. Kuthiwa isinqumo sizophuma ngelizayo.
UJames Dlamini oyiMenenjajikelele ye-Eagles, utshele ILANGA ukuthi bazosikhipha ngelizayo isinqumo esisemthethweni ngoKG. Mayelana nomdlalo neMaccabi FC, uthe balindele umdlalo onzi- ma kakhulu. Uthi bafuna ukulungisa ngalo mdlalo irekhodi labo elingelihle lasekhaya.
“Abadlali bagcwele ukuzethemba emuva kokunqoba iCape Umoya United ngeledlule. Yize iseyinde indlela esazohanjwa kodwa ikusasa libukeka lilihle,” kusho uDlamini.
Ubalise ngokulinyalelwa ngabadlali abamqoka okubalwa kubona uMuzi Thabotha obengekho ngeledlule, uDavid Booysen obekubhekeke ukuba aqale ukujima izolo ngoLwesithathu, u-Andile “Carrot” Fikizolo noMagwegwe Msomi. Uthi babheke amangwevu kuLebohang Sentsho abamboleke kwi-Orlando Pirates ovuthayo ejimini, uSamuel Manganyi noVictor Baker abakulambele ukudlubha ijezi.
U-Allan Norman ongumnikazi weMaccabi FC, uthe babhekene nengwadla kwazise i-Eagles isikhombisa ukuvuthwa. Nokho uthi bazimisele ngokubuya namaphuzu agcwele yize kungeke kube lula.
Isiyonke imidlalo yeNFD engempelasonto imi kanje: NGOMGQIBELO EThohoyandou: Tshakhuma FC vs Witbank Spurs 15h00.
ETuks: Pretoria University FC vs Stellenbosch FC 15h30.
Kabokweni: TS Sporting vs Cape UMoya United 15h30.
ECape Town: Ajax Cape Town vs Real Kings 15h30.
EChatsworth: Royal Eagles vs Maccabi FC 15h30.
EPrincess Magogo: UThongathi FC vs Mbombela United 15h30. NGESONTO EMhlathuze Sports: Richards Bay vs TS Galaxy 15h30.
EMakhulong: Jomo Cosmos vs UBuntu Cape Town 15h30.