UMLANDO OMUSHA NGE-BUCS NE-CHIEFS ETHEKWINI
IPREMIER Soccer League (PSL) izoqopha umlando KwaZulu-Natal okubukeka uzothatha iminyaka ucimeke njengoba kuzokwenzeka into eyimvela kancane emhlabeni jikelele.
I-Orlando Pirates izobhekana namaZulu FC kwi- quarter final yeTelkom Knockout ngoMgqibelo ngo18h00 eMoses Mabhida Stadium, eThekwini. NgeSonto ngo-15h00, iKaizer Chiefs izokwamukela iSuperSport United kwiquarter final yawo lo mqhudelwano kuyo le nkundla yaseThekwini.
Le midlalo kulindeleke ukuba inyakazise iKwaZulu-Natal nezinye izifundazwe kwazise kuyaqala ukuthi izinkunzi zamakilabhu zigijime imidlalo yazo yomkhumulajezi enkundleni eyodwa ngempelasonto eyodwa.
Ngokocwaningo olufushane olwenziwe yileli phephandaba emaligini amakhulu emhlabeni njengase-England, eSpain naseGermany, akukaze kubonakale amakilabhu akhona amakhulu eshiyelana inkundla eyodwa ngempelasonto eyodwa emidla- lweni yenkomishi eyodwa.
IMoses Mabhida izokuba yinkundla yokuqala ukwamukela izinkunzi zamakilabhu ngempelasonto eyodwa. Nokho lokhu akuzoqopha nje umlando kuphela kodwa iKwaZulu-Natal izothuthuka kakhulu kwezomnotho njengoba kuvela ukuthi baningi abantu bakhona abadla imbuya ngothi. Ukuza kwemidlalo yalolu hlobo eThekwini kunothisa kakhulu lesi sifundazwe, kuvulele nabantu bangaphandle ukuba bazotshala imali kusona.
Leli phephandaba lishayela uMato Madlala obambe isikhundla sokuba yisikhulu esiphezulu kwiPSL, uthi okuzokwenzeka KwaZulu-Natal ngale mpelasonto kuzokuba yingqophamlando.
“Kwamina kangikaze ngizwe ngento enjena ngisho naphesheya kwezilwandle imbala ukuthi amakilabhu ahlonishwayo kulelo lizwe agijime imidlalo yawo yomkhumulajezi enkundleni eyodwa. Siyiligi siyafisa ukuba abantu baphume ngobuningi babo bazokweseka le midlalo ngoba ngaphandle nje kokuqopheka komlando kuzodayiseka kahle ibhola lethu neKwaZulu-Natal ngokunjalo. Siyacela-ke futhi ukuba baziphathe kahle enkundleni,” kusho uMato.