USUTHU LUBAMBE UMOYA NGESILOMO
UMQEQESHI wamaZulu FC uCavin Johnson ukhinyabezekile kulimala isiqongqwane sakhe ngaphambi komdlalo omqoka neOrlando Pirates we-quarter final yeTelkom Knockout ngoMgqibelo ngo-18h00 eMoses Mabhida Stadium, eThekwini.
UJohnson utshele ILANGA izolo ngoLwesithathu ukuthi ukulimala kukaTapelo Nyongo kuphazamise izinhlelo zakhe kwazise ungomunye wezinsika zakhe. UNyongo udonseke umsipha ngoLwesibili ejimini osekwenze waba segunjini labagulayo. Nokho uthi unethemba lokuthi kungenzeka aphase ukuhlolwa kokugcina ngaphambi kwalo mdlalo obhekwe ngabomvu ngabaningi.
“Ungomunye wabadlali abamqoka kakhulu ekilabhini. Nginethemba lokuthi uzokwazi ukuphasa ukuhlolwa kokugcina ukuze agijime kulo mdlalo,” kusho uJohnson.
USuthu nePirates bazokube behlangana okwesibili ezinyangeni ezimbili kwazise ngedlule la makilabhu atholane phezulu koweAbsa Premiership obuseKing Zwelithini Stadium, eMlazi. Kulo mdlalo la makilabhu ashayane aze abukana kuba ngu-1-1 kanti womabili adlale ingcwenga yebhola.
Ngaphambi kokuqala kwesizini, uSuthu lumemezele ukuthi yonke imidlalo yalo luzoyigijimela eMlazi kungakhathalekile ukuthi ngeyomkhumulajezi noma ngeyeligi. Le kilabhu ibhalise uMlazi njengenkundla yokuqala, iPrincess Magogo njengeyesibili bese iMoses Mabhida kuba ngeyesithathu uma kwenzeka zingatholakali zombili lezi ezisemalokishini amakhulu aseThekwini.
Ukushovwa yiligi kwalo mdlalo eMoses Mabhida kakuwathenanga amandla AmaZulu njengoba uJohnson ezwakalise ukuthi lokhu kakumkhathazi nakancane.
“Okubalulekile kimina wukugcina imiqondo yabadlali igxile ensimini. Ukuthi sidlalela kuyiphi inkundla kakusho lutho kangako. Sizimisele ngokwenza kahle,” kusho uJohnson.
Ugcizelela ukuthi weneme ngakubona ejimini selokhu kuqale isonto njengoba ezwakalise ukuthi bonke babukeka bekulambele ukugijima lo mdlalo.
“Noma ungaya kuliphi izwe kuyefana, uma abadlali bezobhekana nekilabhu enkulu bazimisela ngokuphindiwe. Nokho namaZulu ayikilabhu enkulu, kumele sibuyise udumo lwawo ngokuqala sinqobe izinkomishi,” kusho uJohnson.
Uqhube ngokuthi ngeke abonakale kulo mdlalo uMoeneeb “Slimkat” Josephs ongomunye wonozinti bale kilabhu okuvele ukuthi ugulelwa ngunina obekwesinye sezibhedlela eCape Town. Kuthiwa usephumile esibhedlela yize uJosephs ebesaseCape Town.
Ukungabi bikho kukaJosephs kushiya uSiyabonga Mbatha nejoka lokuqinisekisa ukuthi uvimba ngisho impukane kulo mdlalo ukufaka ezakhe kuma-semi final alo mqhudelwano ovikelwa yiBidvest Wits.