Badonswe ngendlebe abalandeli beChiefs
Ubundlavini bungasho ukuvuka kwesigwebo
KUKHUNJUZWA abalandeli beKaizer Chiefs ngobumqoka bokuziphatha kahle enkundleni njengoba izobhekana neSuperSport United emdlalweni we-quarter final yeTelkom Knockout ngeSonto ngo-15h00 eMoses Mabhida Stadium, eThekwini.
UJessica Motaung ( osesithombeni) onguMqondisi wezokuMakethwa kweziMpofana, uthe abalandeli kumele bakhumbule ukuthi banesigwebo sokudlala imidlalo emithathu ngaphandle kwabalandeli esilenga ekhanda labo.
Umdlalo owodwa ulengisiwe, kanti iChiefs isiwudlalile owokuqala lapho ihlulwe khona yiPolokwane City ngo-1-0 kwiligi.
Umdlalo olandelayo wokugcina ezowugijima ibukwa yizihlalo, uzokuba ngesonto elizayo ibhekene neChippa United kwiligi khona eMabhida. Lo mdlalo olengisiwe unombandela wokuthi ingatholakali isephutheni elifanayo lobundlavini babalandeli abavele bacekela phansi impahla becikwa wukuhlulwa yiFree State Stars kwiNedbank Cup ngesizini edlule.
UJessica uthi iphutha elincane nje elingenziwa ngabalandeli ngeSonto, lingaholela ekutheni kuvuke isigwebo esilengisiwe. Uthi umdlalo weSuperSport bawulethe eThekwini ngoba becabangela bona abalandeli abanomthwalo wokubuka ikilabhu yabo komabonakude emidlalweni emibili ngenxa yesenzo sabo esingesihle.
IChiefs igcizelele ukuthi kayinazo izinhlelo zokuhambela abalandeli bayo ngaphambi kwalo mdlalo njengoba umdlalo wangeSonto kungoweTelkom, kanti le nkampani yiyona ezisingathele zonke izin- hlelo zokuhambela umphakathi.
Yize kunjalo, iChiefs ithe izovakashela esitolo sayo eMega City ngoMgqibelo kusukela ngo-10h00 kuya ku-14h00. Lapha izokube iphisana ngamathikithi, izikibha, amasim card akwaVodacom bese ikhuthaza umphakathi ukujoyina umshwayilensi wekilabhu.
Sisekuzo izinhlelo zokuvakashela umphakathi, abakwaTelkom bazohambela izinxanxathela zezitolo ezahlukene eThekwini kusukela kusasa ngoLwesihlanu nangoMgqibelo ngo-10h00 kuya ku-17h00 kuzona zombili izinsuku.
Bazokuya eBridge City Mall, ePhilani Mall, KwaMyandu Shopping Centre naseMega City. Bazokube bephisana ngamathikithi nokunye okuningi.
Abalandeli bebhola abasebenzisa uTelkom, bangaphinde bazibeke ethubeni lokuhlomula ngo-R1 million ngokushaya u-*123# bathenge ama-bundle bese beqagela umphumela wemidlalo yeTelkom Knockout.
...iphutha elincane nje elingenziwa ngabalandeli, kungavuka isigwebo.