I-PIRATES NE-CHIEFS BAKLOLODELANA NGOKUGCWALISA I-MOSES MABHIDA
SEKUQUBUKE umbango phakathi kwabalandeli be-Orlando Pirates nabeKaizer Chiefs njengoba lezi zinkunzi zaseGauteng zizogijima imidlalo yazo emqoka eMoses Mabhida Stadium, eThekwini.
Kuzovula i-Orlando Pirates ezobhekana namaZulu FC kwiquarter final yeTelkom Knockout ngoMgqibelo ngo-18h00 eMoses Mabhida Stadium, bese kuvala iKaizer Chiefs ezobhekana neSuperSport United ngeSonto ngo15h00 kuyo le nkundla.
ILANGA lithole ukuthi amaziko ala makilabhu aqhoshelana ngokuthi ngale mpelasonto yilapho kuzocaca khona ukuthi iyiphi ikilabhu enkulu kunenye. Athi okuzocacisa lokho wukuthi ngobani abazoyigcwalisa ukwedlula abanye njengoba ziqhathiwe.
Lezi zindaba ziqinisekiswe nguJoice “Mama Joy” Chauke ongumlandeli wokuqina weBucs noMasilo Machaka weChiefs.
Lokhu kungcofana sekuqubule omkhulu umsindo kangangoba kunabanye abalandeli abaqhamuka kwezinye izifundazwe abashayela eMoses Mabhida befuna ukwazi ukuthi izinhlelo zokubasingatha ngabe ziseqophelweni eliphezulu yini. Kuthiwa nezicukuthwane ngokunjalo nazo zishayela izikhulu zale nkundla zifuna isaphulelo njengoba ezinye zifuna ukuyibuka yomibili le midlalo.
Leli phephandaba lishayela uVusi Mazibuko oyiMenenja-jikelele yeMoses Mabhida Stadium, ukuqinisekisile ukuthi bazwile ngomsindo ophakathi kwabalandeli wokuthi ngubani omkhulu kunomunye.
“Engingakusho nje wukuthi ngale mpelasonto sizoqhubeka nokuqopha umlando njengoba kuyinto le nkundla ehlale iyenza. Izinhlelo zayo yomibili le midlalo zihamba kahle impela, ngingakusho ngingananazi ukuthi konke kuqondile. Sizwile-ke ukuthi kunombango okhona kubalandeli wokuthi ngubani omkhulu kunomunye. Lokho sizokubona ngezibalo emdlalweni ngamunye. Sizolokhu sibazisa nje abantu ngokwenzakalayo kodwa engifuna ukukusho wukuthi ezokuphepha nokunye nje okuningi kuzokube kuseqophelweni eliphezulu,” kusho uMazibuko.
Ukuqinisekisile ukuthi kunezingcingo azithole ezicukuthwaneni ikakhulukazi zangaphandle kwakuleli dolobha yingakho benqume ukuzenzela akubize nge-combo yokubuka yomibili le midlalo ngesaphulelo.
“Amathikithi ezicukuthwane elokuqala libiza u-R1 400 umdlalo ngamunye, elesiliva libe ngu-R1 600 bese elegolide libe nguR2000. Uma umuntu ethenga awokubuka imidlalo yomibili okuyi-combo sizokube sesimunika isaphulelo sika-10% kunoma ngabe awaliphi inani. Sethemba ukuthi abantu bazoyithokozela le ndumezulu yemidlalo ezokwenzeka kule nkundla ehlonishwa umhlaba wonke,” kusho uMazibuko.
Amathikithi ajwayelekile okubuka imidlalo eseMabhida abiza u-R60 awabadala kuthi awezingane atholakale ngo-R15 eTicketPro nasezitolo zakwaSpar ezweni lonke. Aweminye imidlalo yama-quarter final abiza uR40.