OwoSuthu ulubalubela umlando ngeBucs
UTade uqale ukuhalela ukudlala eMabhida ngo-2010
ULUBALUBELA ukuqopha umlando ngeOrlando Pirates u-Emiliano Tade wase-Argentina ongumgadli wamaZulu FC azoshukana namaBhakabhaka kwi-quarter final yeTelkom Knockout ezokuba ngoMgqibelo ngo-18h00 eMoses Mabhida Stadium, eThekwini.
UTade utshele ILANGA ukuthi kudala ephupha ngokuyogenda ibhola kule nkundla eyamkhanga ngesikhathi eyibona kumabonakude kudlala imidlalo yeNdebe yoMhlaba ebikuleli ngo-2010. Usakhumbula umdlalo owabe ukule nkundla wama-semi final phakathi kweNetherlands eyahlula iGermany.
“Ngimagange njengoba ngizodlala okokuqala ngqa eMoses Mabhida Stadium. Ngifuna uku- bingelela le nkundla ngegoli. Nokho okubaluleke kakhulu wukuthi ngisebenze ngokukhulu ukubambisana nozakwethu ukuze sigcine siwunqobile lo mdlalo,” kusho uTade oshaye elinye lamagoli uSuthu luwashisa ijezi iCape Town City ngo-2-0 esigabeni sikalast 16 eKing Zwelithini Stadium, eMlazi.
Ugcizelele ukuthi ukunqoba kwePirates iKaizer Chiefs ngo-2-1 koweligi ngeledlule eGoli yinto engeke ibe namthelela koweTelkom.
“Sizowuhlelela kahle kakhulu lo mdlalo. Phela sidlalile nePirates (eMlazi) siyayazi lapho ibuthaka khona. Okumqoka kakhulu wukuthi sidlale ngokwemiyalelo yomqeqeshi wethu (uCavin Johnson),” kusho uTade.
Okuqaphelekile ngesikhathi uSuthu lujima wukuthi abadlali balo bebebukeka bebukhuphekhuphe kucaca ukuthi bonke bayalifuna ijezi kulo mdlalo okulindeleke ukuba uhehe izinkulungwane zabalandeli.
UBrilliant Mkhathini ongumxhumanisi woSuthu nabalandeli ubanxusa ukungquzuka kuzona zonke izinkalo ukuzeseka ikilabhu. Uthi kungaba yinto embi ukuthi bagqitshwe yizihambi besekhaya. Amathikithi alo mdlalo aseqalile ukudayisa eTicketPro nasezitolo zakwaSpar ezweni lonke kanti abiza uR60 awabadala noR15 awezingane ezineminyaka yobudala engaphansi kwengu-12.
Qaphela! Ungaphuthelwa wukufunda kabanzi ngoTade ngempilo yakhe yangasese engosini iNgaphandle kweNkundla kwiLANGA langeSonto. Walala wasala!