NGABE KUYAPHELA NGOMALUSI GIGABA?
Kuthiwa wephule indlela yokuziphatha njengelungu lekhabhinethi
USEPHINDE wangena obishini uNgqongqoshe wezaseKhaya, uMnu Malusi Gigaba, onyakazise iNingizimu Afrika nge- video yocansi ebiveza isitho sakhe sangasese.
Izolo ugqemeke engeqiwa ntwala njengoba uMvikeli woMphakathi, u-Adv Busisiwe Mkhwebane, ekhiphe izincomo zokuba uMengameli Cyril Ramaphosa kumele amthathele izinyathelo ngokuphula umthethosisekelo waseNingizimu Afrika.
U-Adv Mkhwebane uthi uthole ukuthi uMnu Gigaba waqamba amanga mayelana nesivumelwano phakathi kukahulumeni nenkampani yezindiza, iFireblade Aviation.
Ngalokho unyathele umthethosisekelo wezwe nendlela yokuziphatha kwelungu lekhabhinethi, ayefungile ukuthi ngeke kwenzeke. Kuzokhumbuleka ukuthi ngasekuqaleni kwalo nyaka, ilungu lephalamende leDA, uMnu John Steenhuisen, lifake isikhalo ehhovisi lika-Adv Mkhwebane mayelana nesinqumo esithathwe yiNkantolo eNkulu yasePretoria ngo-2017 ngecala ebeliphakathi kweFiredale Aviation noNgqongqoshe wezaseKhaya.
Kulesi sinqumo senkantolo, iJaji Neil Tuchten, laveza ukuthi uMnu Gigaba wasenga ezimithiyo efungile. Kulesi sikhalo sakhe uMnu Steenhuisen, uthe kucace bha ukuthi uMnu Gigaba akagcinanga nje ngokuqamba amanga, kepha wephule nemithetho yokusebenza ngaphansi komthethosisekelo.
“Ngemuva kophenyo lwami, ngimthumelelile incwadi mhla ka-8 kuMfumfu (October) uMnu Gigaba, ngithi ngifuna ukumnika ithuba lokuba azoziphendulela ngalolu daba. Ngimnike izinsuku eziwu-10 kusukela ngalelo langa ukuba aphendule,” kusho u-Adv Mkhwebane izolo ngoLwesithathu.
Uveze ukuthi uMnu Gigaba akazange azihluphe nangokuphendula, okuyilapho eqhubeke khona nokuhlanganisa lo mbiko. Uqhube wathi akaphenyi udaba obelube- kwe phambi kwenkantolo kepha umsebenzi wakhe bekuwukuphenya ngokuziphatha kukaMnu Gigaba ngaphansi kwemigomo yokuziphatha kwelungu lekhabhinethi.
Uthole ukuthi uyephulile. U-Adv Mkhwebane uthi uselinde ihhovisi likamengameli ukuba limtshele ukuthi lizothatha ziphi izinyathelo ngalolu daba zingakapheli izinsuku eziwu-20 kuphume lo mbiko.
NgoLwesibili kuvele ukuthi ikomidi lephalamende libhalele uMnu Gigaba incwadi, limbiza ukuba ayoziphendulela nge- muva kokuba usomabhizinisi, uMnu Nicky Oppenheimer, emsole ngokuqamba amanga phambi kwephalamende.
Leli komidi belifuna uMnu Gigaba ayolichazela kabanzi ngesivumelwano esenzeke phakathi kweFireblade Aviation nohulumeni.
UMnu Oppenheimer nendodana yakhe, uJonathan, bebephambi kwekomidi lommnyango wezasekhaya beyochaza ngokusebenza kwenkampani yabo esikhumulweni sezindiza i-OR Tambo International Airport, okuyikho okuholele ekutheni bafakane enkantolo noMnu Gigaba.
Le njinga yakwa-Oppenheimer iveze ukuthi yethuka ngesikhathi uMnu Gigaba ezama ukwenza ukungathembeki esivumelwaneni abasenza ehhovisi lakhe, esasivumela ukuba isikhumulo sabo (esingase-OR Tambo) sezindiza sikwazi ukwamukela amabhanoyi aphuma phesheya kwezilwandle.
“Into yokuqala nje ungongqoshe asitshele yona, wukuthi kuyamjabulisa ukusitshela ukuthi uyasini- ka imvume futhi useyisayinile incwadi, uzosinika yona uma konke sekumi ngomumo,” kusho le njinga kuleli komidi.
Ithe kakulona iqiniso ukuthi isikhumulo lesi bekungesomndeni kuphela nokuthi sivumela izindiza zingene ziphume noma yikanjani kuleli lizwe.