UKHUZA UKUHHEWULWA KWABADLALI
KUNKENTEZA amazwi kaIrvin “Iron Duke” Khoza onguSihlalo we-Orlando Pirates kuHappy Jele (osesithombeni) oyisitobha sale kilabhu eqhathwe namaZulu FC kwi- quarter final yeTelkom Knockout ngoMgqibelo ngo-18h00 eMoses Mabhida Stadium, eThekwini.
UJele utshele ILANGA izolo ngoLwesithathu ntambama ukuthi yinye nje vo into abayiphokophele kulo mqhudelwano, wukuqukula inkomishi yawo. Unxusa abalandeli ukuba babasize ngokubagqugquzela, bangalokothi bahhewule abadlali ngoba lokho kubathena amandla. Ugcizelela eyokuthi akekho umdlali ongena enkundleni ngenhloso yokuyodlisela ikilabhu.
Ngaphambi kokuqala kwesizini uKhoza ulibeke ngesihloko elokuthi kuyihlazo elibi ukuthi iPirates iqeda isizini inganqobanga lutho ukujabulisa izinkumbi zabalandeli bayo.
“IPirates yikilabhu enkulu kakhulu. Sihlalelwe wumsebenzi wokubonga usihlalo nabalandeli ngokubanqobela le nkomishi. Kasifuni lena kuphela kodwa zonke esisazobamba iqhaza kuzona sizolwela ukuba zingene ekhabetheni lethu,” kusho uJele.
Uthi ukunqoba omkhaya babo, iKaizer Chiefs ngo-2-1 kwiligi ngeledlule eGoli, sekufana nomlando ngoba kabafuni ukufika bezithwele bese bephoxeka.
“Nakuba ukuhlula iChiefs kusifake ugqozi oluthe xaxa kodwa ngeke sizithwale kulo mdlalo kwazise sizokube sibhekene nezimbangi ezihluke kakhulu.
"Okunye okumqoka nakakhulu ngawo wukuthi ngowomkhumulajezi, iphutha elincane lisho ukuphuma emqhudelwaneni,” kusho uJele.
Uthi ikilabhu ezonqoba lo mdlalo ngezokhombisa intshisekelo yokuwulambela kusuka usaqala kwazise ulindele ukuba kusiphuke izidindi kuwona. “Umqeqeshi wethu (uMilutin Sredojevic) uthe kumele sizethembe bese senza konke azokube esiyale ngakho ukuwunqoba.
"Sizimisele ngokungamphoxi nakancane,” kusho uJele onxuse abalandeli ukufika ngezinkani kulo mdlalo. Uthe bazokwenza konke okusemandleni ukubajabulisa.
Abadlali okulindeleke ukuba badlise uSuthu ngamapayipi nguVincent Pule, uJustin Shonga, u-Augustin Mulenga, uThembinkosi Lorch, ukukha nje phezulu kwabavutha bengabaselwe kulezi zinsuku. Ohlangothini loSuthu kubhekeke ukuba kugqame uJabulani Ncobeni olihlikihla kuhlanye izihlwele esiswini, uThembela Sikhakhane oshoshelayo noBongi Ntuli ongumgadli.
Isiyonke imidlalo yama-quarter final eTelkom Knockout iqhathwe kanje:- NGOMGQIBELO
EPeter Mokaba Stadium: Baroka FC vs Mamelodi Sundowns 15h00 (SS4).
EMoses Mabhida Stadium: AmaZulu FC vs Orlando Pirates 18h00 (SS4).
EHarry Gwala Stadium: Maritzburg United vs Bidvest Wits 20h15 (SS4). NGESONTO EMoses Mabhida Stadium: Kaizer Chiefs vs SuperSport United 15h00 (SS4).