Owesifazane omnyama wakha isikhungo sezigidi zamarandi
UHLELO loMnyango wezokuThutha lokuphuthumisa uguquko kwin- hlalo- mnotho, lubonakale luthela izithelo ezinhle kulandela ukuqokwa kwenkampani yokuqala ephethwe ngo-100% ngowesifazane omnyama ukuba yengamele umsebenzi wokwakha isikhungo samatekisi namabhasi eMzimkhulu. UThandi Florentine Ngcobo, ungusonkontileka omnyama, ongumnikazi wenkampani yokwakha iZamadinga Business Enterprise cc. Nguyena ozobhekana nokwakhiwa kwesikhungo Umzimkhulu Integrated Public Transport Facility esizodla R82 million. Ekhuluma emcimbini wokwethula le nkontileka obuseMzimkhulu muva nje, uMphathiswa wezokuThutha, ukuPhepha nokuXhumanisa uMphakathi uMnu Mxolisi Kaunda uthe ukwakhiwa kwalesi sikhungo esisezingeni lomhlaba kuhambisana nezinhlelo zokuletha uguquko embonini yokuthuthwa komphakathi, ikakhulukazi emadolobheni amancane. Lesi sikhungo sizomumatha amabhasi angu- 10, amatekisi angu- 90, kubuye kuhlanganise nendawo yokulindela ukulayisha amatekisi namabhasi. Umphakathi uzokwazi nokuthola izindlu zangasese. “Njengoba ukwakhiwa kwale renki sekuqala manje, kuyangithokozisa ukuthi inkontileka yokwakha itholwe ngumuntu wesifazane omnyama, futhi uzosebenzisa nabanye besifazane uma sekwakhiwa. Uhulumeni ufuna ukubona izinkampani eziphethwe abantu abamnyama ngokugcwele ikakhulukazi osonkontileka besifazane ngokomgomo wohlelo IGULA,” kusho uKaunda. Uhlelo IGULA lusungulwe uMnyango wezokuThutha ukubhekela ababencishwe amathuba phambilini. Igama IGULA lifinyeza amagama athi ‘ Inclusive Growth, Unity and Economic Liberation of Africans in particular and Blacks in general”. UNgcobo, inkampani yakhe esungulwe ngo- 2003, uthe akuyona yonke imigwaqo ehlale iqondile, “kodwa ngikwazile ukuthi ngibe lapha ngoba ngakhetha ukuthi ngingahlali ezintweni ezimbi kodwa ngisebenzise zona ukuya phambili ukuze ngizuze lokho engikudingayo.” “Inselelo ebengibhekana nayo ngukuthi ngingatholi imisebenzi ngenxa yobulilii bami. Enye inselelo eyokuthi njalo kumele ngizame ukwenza kakhudlwana ukuze ngikwazi ukukhombisa ngingakwazi ukwenza nokufeza lowo msebenzi enginikezwe wona,” kusho uNgcobo. Njengamanje uNgcobo usesigabeni uStage 8 kwiGeneral Building noStage 7 kwiCivil Engineering kanti usesebenze amaphrojekthi amakhulu angaphezulu kweshumi.