UCele uwuqinise idolo umndeni wephoyisa
Ubathembise ukuthi bazobanjwa maduze ababulali
AHLULEKILE wukuzibamba, asho ngengila amalungu omndeni wakwaNdaba, e-Unit 2, eMbali, eMgungundlovu, ngesikhathi kutheleka uNgqongqoshe wamaPhoyisa, uMnu Bheki Cele, izolo ngeSonto enkonzweni yomngcwabo welungu lawo ebeliyiphoyisa, elibulawe emagcekeni kamasipala.
UMnu Thobani Ndaba (44), ( osesithombeni esincane), obeyisikhulu esiphezulu emaphoyiseni omgwaqo kuMasipala uMvoti, ubulawe ngoLwesine ebusuku emagcekeni awo lo masipala.
UMnu Cele uthe akayile kwaNdaba ukuyobakhalisa, ngoba uyazi kabalindele izinyembezi kuyena, kepha uye khona ukuyobatshela ukuthi kakusensuku zatshwala bazivalele izigilamkhuba ezibulale leli phoyisa.
Uveze ukuthi uMnu Ndaba udutshulwe ngentululwane yezinhlamvu, kusetshenziswa ama-AK47.
“Kuyethusa ukuthi umuntu abulawelwe emsebenzini ngale ndlela.”
Uqhube wathi iKwaZulu-Natal ihlaselwe yisihlava sokunukelwa yigazi njengoba abantu bebulalana mihla namalanga.
“Ungathi kunempepho eshunqisiwe, eyenza abantu babulalane,” kusho uMnu Cele.
Uthi ngisho abantu ababulawa ngaphandle kwalesi sifundazwe, kuyamangalisa ukuthi abaningi babo babulawa ngabantu baKwaZulu-Natal.
Ubalule udaba lommeli waseCape Town, uMnu Peter Mihalik, okusolwa ukuthi ubulawe ngabesilisa baKwaNongoma, uMnu Senzokuhle Biyela (26) noMnu Nkosinathi Khumalo (31) - okusolwa ukuthi bayizinkabi.
Uphinde waphawula ngokubulawa kwamalungu omndeni waseMgungundlovu awu-7 abefihlwa izolo ngeSonto, wathi nakuwona kusolakala isihlobo ebesisondelene kakhulu nawo ekubulaweni kwawo. Akayishiyanga eyonogada baseGoli, ababulawe ngabesilisa baseNkandla beseMaponya Mall, eGoli.
IMeya yaseMvoti, uMnu Thami Ngubane, ithe: “Njengomasipala silahlekelwe kakhulu kanti siyethemba ukuthi kuzoba nozinzo uma kungase kutholakale umnyombo mayelana nokubulawa kukaMnu Ndaba.”
Okhulumela umndeni wakwaNdaba, uMfu Bongani Ndaba, uthe njengomndeni balahlekelwe kakhulu.
Ungathi kunempepho eshunqisiwe, eyenza abantu babulalane.