UMALUSI GIGABA UTHI AKAYI NDAWO
ISALOKHU iqhubeke njalo ingcindezi yokuba uMengameli Cyril Ramaphosa akhombe indlela uNgqongqoshe wezaseKhaya, uMnu Malusi Gigaba ( osesithombeni), osekubikwe amahlazo ahlukene ngaye esikhathini esifushane.
UMnu Gigaba utshele iphephandaba lesiNgisi eliphuma ngeSonto, iSunday Times, ukuthi uzolwa kuze kube sekugcineni nalabo abakha itulo lokuthi axoshwe.
“Uma ngenza lokho abakushoyo, ngiyobe ngithobela bona, okuyobe kusho ukuthi kusukela manje bonke abantu abayizisulu zemikhankaso ehlose ukuba kungasebenzeki kwezepolitiki, kumele bacele umaluju kubaqhubi baleyo mikhankaso.
“Mabeze ngibalindele, ngizolwa kuze kube sekugcineni, mabangalinge bacabange ukuthi bazozenzela lapha kimi‚” kusho uMnu Gigaba.
Ngeledlule uMnu Gigaba unekwe njengomuntu onamanga ngesikhathi umndeni wezimpunyela zakwa-Oppenheimer utshela ikomidi elibhekele izindaba zomnyango wezasekhaya ukuthi waqamba amanga ngesikhathi ethi akazange awunike imvume yokuba usebenze esikhumulweni sezindiza, i-OR Tambo International.
UMvikeli woMphakathi, u-Adv Busisiwe Mkhwebana, ukhiphe izincomo zokuba uMengameli Ramaphosa amthathele izinyathelo ngokunyathela umthethosisekelo - njengoba eqambe amanga yize wayefungile ngesikhathi ethatha isikhundla ukuthi uzowuhlonipha.
Ngaphandle kwesigameko esiphenduke indabizekwayo sokuvela kwe- video uMnu Gigaba ephulula isitho sakhe sangasese, usebuye waba sematheni ngokuthi phezu kwalo lonke lolu twayi olumlandelayo, ushaya phansi ngonyawo uthi ngeke alale engandlalelwe, ngeke azesulele esikhundleni sokuba ngungqongqoshe.
Uthi uzotshelwa nguMengameli Ramaphosa ukuthi ashenxe noma cha. Bheka nasekhasini 12