Akukacaci ngezikhundla eNdumeni

Sekuphele isonto engekho usomlomo

Ilanga - - Izindaba - NONHLAKANIPHO SHINGA nonhlakaniphos@ilanganews.co.za

UDONSA ngodizili uMasipala waseNdumeni njengoba sekuphele isonto ungenawo usomlomo kanti nemeya sekuyophela inyanga ibhantshi ligcwale umoya.

Kuzokhumbuleka ukuthi ngoMgqibelo odlule isigungu esiphezulu seqembu elengamele lo masipala, i-IFP, siveze ukuthi sinqume ukwephuca ubulungu beqembu, uNkk Bongiwe Mbatha-Makhathini obengusomlomo eNdumeni.

Kwenzeka lokhu nje, sona lesi sigungu siveze ukuthi mhla ka-10 kuMandulo (September), sinqume ukwehlisa esikhundleni uMnu Siboniso Mbatha obeyimeya noNkk Mbatha-Makhathini ngenxa yokuthi sifuna kube nozinzo kulo masipala.

UMnu Mbatha ugcine esulile ngokomyalelo weqembu lakhe, nokho uNkk Mbatha-Makhathini yena wavuma, kodwa washaya ungqimphothwe ngemizuzu yokugcina.

I-IFP ivele yamephuca ubulungu ngoba engafunanga ukulandela imiyalelo yayo. Imenenja kulo masipala, uMnu Siyabonga Ntuli, ithi ukusebenza kakumile yize imeya ingekho.

“Kuzokhumbuleka ukuthi imeya ihola umasipala ngokwepolitiki, bese kuba khona uhlangothi oluhola ngokomsebenzi wansuku zonke kamasipala.

"Umsebenzi wansuku zonke uyaqhubeka ngoba zonke izisebenzi nezimenenja zeminyango ehlukene zikhona.

"Okumile wukuthi kunemicimbi ethile edinga imeya, okuyiyona esisayimisile okwamanje njengoba sisalindele ukuba iqembu likhethe umuntu ozongena kulesi sikhundla," kusho yena.

Uthe odabeni lukasomlomo akakwazi ukukhuluma ngalo ngoba kayikho into ebhaliwe ephambi kwakhe emtshela lokhu okubikwa ngabezindaba.

Isitatimende esikhishwe yi-IFP siveze ukuthi i-Political Oversight Commitee (POC) yayo izoqala ilungiselele ukukhethwa kwemeya entsha nosomlomo.

Kuzokhumbuleka ukuthi uMnu Mbatha usula nje, ubesanda kukhalelwa ngamasongo kaSigonyela okwesibili eboshwa ngoKlebe, ngezinsolo zokuphazamisa ukusebenza komthetho.

Uboshwe nonodaga wakhe besolwa ngokuthi baqambe amanga ngemuva kwengozi yemoto eyenzeke ngoNtulikazi (July), kwalimala imoto kamasipala.

Izinsolo zithi uMnu Mbatha uqambe amanga wathi imoto yayishayelwa yilo nogada, okuthiwa wayengekho ngisho emsebenzini ngosuku lwengozi - naye wavuma - kanti ibishayelwa nguyena ngqo uMnu Mbatha.

NgoNhlaba (May), uke waboshwa ngoKlebe ngezinsolo zokwakha itulo lokusoconga uNkk Mbatha-Makhathini kubangwa amathenda. UNkk MbathaMakhathini uthe akathandi ukukhuluma ngodaba lokuxoshwa eqenjini ngesikhathi ethintwa yiLANGA.

Newspapers in Zulu

Newspapers from South Africa

© PressReader. All rights reserved.