ABAFUNDI BATHOLA UXHASO KWIMPUCUZEKO
ZIGQUGQUZELWE ukungafundeli ukuqashwa kodwa ziqede izifundo zazo bese zivula amabhizinisi izitshudeni eziwu-50 ebeziyingxenye yomcimbi wokwamukelwa kozakwabo abasha, abazoqeqeshwa mahhala yiMpucuzeko Skills Development and Training emkhakheni wokushuthwa kwamafilimu.
Isikhulu esiphezulu sakwaMedia, Information and Communication Technologies Sector Education and Training Authority (Mictseta), uMnu Kealeboga Bogatsu, okuyisona ebesigqugquzela abafundi kulo mcimbi obusemahhovisi eMpucuzeko, eThekwini, ngoLwesihlanu, sithe:
“Sekuyisikhathi sokuba iphele le nto yokuthi abanye abantu benze imali ngamandla enu. IKwaZuluNatal inamaciko amaningi, kodwa kusetshenziswa ubuso bawo aholelwe imadlana kodwa umsunguli wefilimu noma umdlalo asale nemali enkulu. Ngikhuthaza ukuba nifunde bese nivula izinkampani zenu bese siya- nixhasa ukuze nithuthuke,” kusho uMnu Bogatsu.
Isikhulu esiphezulu kwiMpucuzeko, uMnu Thabani Mthembu, sithe ukuqeqeshwa kwabafundi kugxile ekutheni baphume ekilasini sebebhalise nezinkampani zabo, basebenzisane nezinkampani ezinkulu ezikhiqiza amafilimu.
Utshele ILANGA ukuthi okwehlukile ngohlelo lwabo wukuthi kufundisa abantu abasendimeni yamafilimu.
“Ukusebenzisa abantu abavele besemkhakheni wezamafilimu ukufundisa, kusisize kakhulu ekutheni abafundi basheshe baqasheke ngoba ukulanda uthisha ofundisa enyuvesi kakusenzeli umehluko. Baningi abafundi abaqeqeshwe kwiMpucuzeko asebeshuthe amafilimu abonakala ngisho kuMzansi Magic,” kusho uMnu Mthembu.
Uthe lolu hlelo baluqale ngo-2010 kanti bathatha abafundi kusona sonke isifundazwe, ikakhulukazi abasuke behleli emakhaya bephase umatikuletsheni, bengenawo amandla okuqhubeka.