Ubalisa ngesihluku samakilabhu ePSL

Ilanga - - Ezemidlalo - SENZO SOKHELA

UBALISA ngesihluku esenziwa ngamakilabhu agijima kwi-Absa Premiership uLebohang “Cheese” Mokoena ozakhele udumo egijima kwi-Orlando Pirates nakwiMamelodi Sundowns manje osedlala kwiMaccabi, kwiNational First Division (NFD).

IMaccabi iphoxe iRoyal Eagles iyehlula ngo-2-1 koweNFD ngoMgqibelo ntambama eChatsworth Stadium. Lo mdlalo ugijinywe kumuncu ekhempini ye-Eagles emuva kokuba ithole izindaba zokuthi umqeqeshi wayo, uRoger Sikhakhane akasekho emhlabeni. Ubexinwe wukugula.

ILANGA likhuluma noLebohang “Cheeseboy” Mokoena (32) odlala kwiMaccabi, oshaye elinye lamagoli ale kilabhu, ukhale ngesihluku athi senziwa ngamakilabhu agi- jima kwiPremiership.

“Ibhola lalapha eMzansi libuhlungu, uma uke waba neminyaka yobudala engaphezulu kuka-30 kuba nzima ukuthola umsebenzi, ubizwa ngekhehla. Le nto ibuhlungu ngoba abanye bethu baliyeka ibhola besalithanda ngenxa yokuthi basuke bengasawunikwa umsebenzi.

“Ngidonse kanzima emuva kokushiya kwi-Ajax Cape Town ngaze ngabona kungcono ukuba ngehlele kwiNFD ngibe ngizizwa ukuthi ngisengadlala kwiPremiership futhi akhona amakilabhu engingawasiza. Ngiyafisa sengathi ngelinye ilanga ingaphela le nto ebholeni lethu.

"Ibhola lakwamanye amazwe likhulu nje, yingoba kababalahli abadlali ngoba sebebadala, umdlali uze aziyekele yena,” kusho uMokoena.

Uthi akaliphonsile ithawula lokuthi uzobuyela kwiPremiership.

“Imilenze yami isavuma nokulimala obekungihlupha kudlulile manje. Ngisazobuyela kwiPremiership mhlawumbe ngizobuyela nayo iMaccabi ngoba isikimu esinaso siseqophelweni eliphezulu, sibophele abadlali abasebancane nabanesipiliyoni,” kusho uMokoena.

UMokoena ukhuluma kanjena nje, umqeqeshi wakhe kwiMaccabi uMokete Tsotetsi (36) odlale kwiKaizer Chiefs uze waliyeka ibhola esalithanda ngo-2014 ngenxa yokuthi ubeseneminyaka yobudala ebingaphezulu kwengu-30 esebizwa ngekhehla.

Nokho lo mqeqeshi akayingeni leyo njengoba eqenjini lakhe ebophele uThapelo Tshilo adlale naye kwiJomo Cosmos oneminyaka engu-33, uCollins Mbesuma adlale naye kwiChiefs ona-34 noMokoena.

ISITHOMBE NGABE: BACKPAGEPIX

ULEBOHANG Mokoena odume kwi-Orlando Pirates nakwiMamelodi Sundowns manje osedlala kwiMaccabi esesigabeni seNFD.

Newspapers in Zulu

Newspapers from South Africa

© PressReader. All rights reserved.