UGXEKA AMAPHUTHA EZITOBHA OWOSUTHU
UWUQONDISE kubadlali bakhe basemuva umunwe uCavin Johnson ( osesithombeni) ongumqeqeshi wamaZulu FC ahlulwe yi-Orlando Pirates ngo-3-1 esikhathini esengeziwe kwi- quarter final yeTelkom Knockout ngoMgqibelo kusihlwa eMoses Mabhida Stadium, eThekwini.
Amagoli okunqobe ngawo iPirates ananyatheliswe enethini nguThembinkosi Lorch amabili noXola Mlambo, kwathi eloSuthu lokubika lashaywa nguBongi Ntuli. USuthu luqede lo mdlalo lungasaphelele kukhishwa ngekhadi elibomvu uSamuel Darpoh umdlalo sewusalelwe ngamanenjana ukuthi uphele.
USuthu luye kulo mdlalo luvele luhlukumezekile kwazise belungafuni ukuba ugijinywe kule nkundla, belufuna uye enkundleni yalo iKing Zwelithini Stadium, eMlazi. Nokho abaxhasi bazwakalise ukungenami ngale nkundla bawukhomba eMabhida okuyilapho okufike kwenzeka khona umonakalo lubhubha yisi- bhaxu.
UJohnson uwuqondise kubadlali bakhe basemuva umunwe wathi yibona abenzele phansi ikilabhu.
“Bekuwumdlalo omnandi nathi besibuye sibaphonse ezintanjeni. Nokho sibulawe ngabadlali bethu basemuva, benze amaphutha amabili iPirates yawasebenzisa. Iyangikhathaza le nto, siphisana ngamagoli alula ngaso sonke isikhathi. Uma udlala imidlalo yalolu hlobo kufanele uhlale ulenyusile izinga. Abadlali bethu basemuva abazihleli kahle yingakho izinto zigcina kanjena. Kodwa-ke wumsebenzi wami ukuthi ngilungise le nto noma kanjani ngizokwenza lokho, kuyaphoqa,” kusho uJohnson.
Uthi njengoba sekuphelile ngabo ngeTelkom, sekufanele babhekane neligi.
“Sekufanele sibhekane nalo mqhudelwano weligi manje, akukho okunye.
"Sisendaweni embi kufanele siyolwela ukusuka kuyona. Uma ngizwa igama elithi izembe kalizwakali kahle, kakulona nje igama elimnandi engifisa ukulizwa. Kodwa-ke izinto zizolunga,” kusho uJohnson.