KUHLUKENE IMIBONO NGOKUPHENDULWA IZINKUKHU KWABADLALI BOSUTHU
UMILUTIN “Micho” Sredojevic ongumqeqeshi we-Orlando Pirates ukhuthaza isenzo esingahambisani neFifa njengoba isichaza ngokuthi siwukungazihloniphi izimbangi.
IBucs iguqise AmaZulu FC ngo-3-1 kwi- quarter final yeTelkom Knockout ngoMgqibelo kusihlwa eMoses Mabhida Stadium, eThekwini.
IBucs iphendule inhlekisa abadlali boSuthu umdlalo usuzophela ishaya izitayela kuchwaze inkundla. Lesi senzo iFifa ihlale isigxeka njengoba ikholwa wukuthi usuke wehlisa isithunzi sezimbangi futhi ubukisa ngazo.
USredojevic ebuzwa ngesenzo sabadlali bakhe, ukhombise ukubeseka.
“Ibhola lidlalelwa ukujabulisa abalandeli. Lena bekuyindlela yokubajabulisa nokubabonga ngabasenze- la khona. Akusikho ngoba bengingahloniphi izimbangi, umqeqeshi wamaZulu ngimhlonipha kabi.
"Kodwa uma isimo sivuma njengakulo mdlalo sizokwenza hhayi ngenhloso yokungahloniphi,” kusho uSredojevic.
UCavin Johnson ololonga uSuthu, ebuzwa ngalesi senzo sePirates, uqale wakhokha umoya wabe esethi: “Yinto yase-Afrika lena ongeke uyibone kwamanye amaligi amakhulu emhlabeni.
"Mhlawumbe ukuba yithina ebesinqoba kanjena besizokwenza. Kangikukhuthazi ukushaya izitayela umile, akwenzi lutho ngoba ekugcineni umdlali angagcina elimele ngoba usuke echukuluza abanye.
"Kufanele sikwenze emakilabhini anjengeTP Mazembe ukuze kubone umhlaba wonke, singagcini ngokubukisana sodwa,” kusho uJohnson.