I-BUCS NESICELO ESIPHUTHUMAYO KWI-PSL
I-ORLANDO Pirates izama ukufaka isicelo esiphuthumayo kwiPremier Soccer League (PSL) ukuba iyivumele ukusebenzisa u-Alfred Ndengane esanda kumsayinisa esuka kwiBloemfontein Celtic avele wanqamula inkontileka kuyona.
Lezi zindaba zitshelwe ILANGA ngu-Irvin “Iron Duke” Khoza onguSihlalo wePirates odalule ukuthi lo mdlali usayine inkontileka yeminyaka emithathu kumaBhakabhaka.
Lo mdlali uthuse abathandi bebhola esula isigubhukane kwiCeltic, wanqamula inkontileka yakhe sekuvalwe iwindi lokudayiselana ngabadlali.
UKhoza ekhuluma naleli phephandaba izolo ngeSonto emini yasekuseni eseMorocco, athe uyele umhlangano weCaf khona, uthe:
“UNdengane sesimubhalisile, ungumdlali wethu ngokugcwele manje.
"Sisazama ukufaka isicelo sokuthi aqale manje ukudlala kodwa uma kungalungi uzolinda kuze kuvulwe iwindi.
"Usayine inkontileka yeminyaka emithathu nesigamu nekilabhu. Nginethemba lokuthi uzoyixazulula inkinga esibhekene nayo emuva. Sekunesikhathi eside kunesikhalo ngodonga lwethu. Ngethemba ukuthi uzofika nesixazululo.”
Uzwakalise injabulo ngokudlulela kwezakhe kuma- semi final eTelkom Knockout emuva kokuba ziwashise AmaZulu FC ijezi kuba ngu-3-1 ngoMgqibelo eThekwini.
IPirates kuzokuthi kusasa ngoLwesibili ibhekane nePolokwane City kowe-Absa Premiership ePeter Mokaba Stadium.
Isiyonke imidlalo yeligi ezogijinywa phakathi nesonto imi kanjena:- KUSASA NGOLWESIBILI EPeter Mokaba Stadium: Polokwane City vs Orlando Pirates 19h30 (SS4). NGOLWESITHATHU ELoftus Versfeld Stadium: Mamelodi Sundowns vs Free State Stars 19h30 (SS4).
E-FNB Stadium: Kaizer Chiefs vs Black Leopards 19h30 (SS4).