Isasasa kuvulwa ngokomthetho iMount Edgecombe Interchange
AKHONA DLAMINI UNGQONGQOSHE wezoThutha uDkt Blade Nzimande uvule ngokusemthethweni i- Mount Edgecombe Interchange eMhlanga, enyakatho yeTheku, emcimbini wokuphetha imikhankaso yenyanga yezokuthutha ebihlanganisa imicimbi eminingi eyenziwa ezweni lonke. I- Mount Edgecombe Interchange iyingxenye esemqoka yohlelo lwemigwaqo emikhulu kuMasipala weTheku futhi luzosiza ekunciphiseni isiminyaminya sezimoto kugqugquzele nezokuphepha emgwaqeni. Le nxanxathela yomgwao yakhiwe ngokubambisana phakathi kophiko lwezokuThutha kuzwelonke i- SANRAL noMnyango wezokuThutha KwaZuluNatal ngesamba sika- R1.1 billion. UNzimande uthe isiminyaminya sezimoto esidala ukunqwabelana kwezimoto ku- M41 kanye no- N2 ezibalelwa ku- 40 000 ngezikhathi ezimatasa, sekuyinto yakudala njengoba sekunale Interchange nosekushintshe isimo sokubukeka kwesifundazwe nezwe lonke. “Le Interchange enamabhuloho amane abelethene inemizila emibili umzila ngamunye okwenza izimoto zihambe zikhululeke. Lesi sakhiwo sihlanganisa izimpawu zomgwaqo, okuqinisekisa ukuhamba kahle ngokukhululeka kwezimoto kuyo yonke imizila,” kusho uNzimande. “Bangu- 803 abantu abathole umsebenzi kwinkontileka ngokwakhiwa kwe- Mount Edgecombe Interchange, abangu- 724 kulabo abaseThekwini namaphethelo, ngemali elinganiselwa ku- R240 million ekhokhiwe ngamaholo,” kusho uNgqongqoshe uNzimande. Inani eliphelele lamasub- contractor anikwe umsebenzi libalelwa ku- 31 bese kuba nomsebenzi odle imali engu- R59 million owenziwe amabhizinisi amancane, ama- SMME, angu 21.