Abazukulu bashe nomkhukhu ugogo "esesokeni"
Ushiye ikhandlela livutha walandela isoka
ULANDELE isoka axabane nalo ngoMgqibelo ebusuku, kwasala kwasha izingane, enye yazo yasha yangqongqa, owesifazane waseMountview, eVerulam.
Simuncu isimo emndenini wakwaMbuyisa emuva kokusha kwendlu ebilele izingane ezintathu, kwashona uMelokuhle Mkhize (4), ongumzukulu walona wesifazane onguNkz Nokuthula Mbuyisa (35), ezakhe izingane ezimbili zaphunyuthiswa esibhedlela.
Ngokuthola kweLANGA, uNkz Mbuyisa ushiye ikhandlela livutha ngesikhathi ephuthuma isoka kanti kuzothungeleka izingubo nombhede. ILANGA lihambele kulo mndeni izolo emini, lafika isimo simuncu, omakhelwane bematasa belekelela ngokuqoqa egcekeni njengoba indlu engemuva komuzi omkhulu - okuyiyona ebilele izingane - ishe yaphela.
ILANGA lifike kulo mndeni uNkz Mbuyisa ehleli emakhandleleni, engakwazi ngisho ukukhuluma njengoba unina kaMelokuhle bekuthiwa usayolandwa eMtubatuba lapho efunda khona.
UNkz Londiwe Mbuyisa oyilungu lomndeni, uthe izingane bezilele egunjini elilala uninakhulu, kanti kuzoqubuka ingxabano phakathi kwakhe nesoka lakhe.
“Ngesikhathi bexabana, isoka lakhe lidubile laphuma endlini, lahamba. Uphumile wakhiya endlini walilandela ngoba efuna ukubona ukuthi liya endlini yalo ngempela yini. Endlini ushiye ikhandlela livutha, libekwe esitsheni se- yoghurt.
"Uthe uma ebona ukuthi isoka lakhe liya endlini, wabe esedlulela kubangani bakhe abahlala eduze nje. Ngiyacabanga ukuthi ikhandlela livuthe laze lafika kulesi sitsha se- yoghurt sabe sesiyathungeleka. Mina bengilele, ngize ngezwa umakhelwane esebulala isicabha kule ndlu ehlala uninakhulu wengane.
"Ngithe uma ngivuka, ngabona ilangabi selilikhulu ngendlela exakile.
"Ngiphume umakhelwane esekwazile ukudonsa laba ababili yize nabo bese beshile. Lona omncane bazamile ukumdonsa kwasho ukuthi usenamathele embhedeni kwazise ubeseshe kakhulu.
"Indlela ashe ngayo, kuze kwaqhuma nekhanda njengoba ubengasabonakali nokuthi ungubani” kusho uNkz Mbuyisa. Echaza, uthi umakhelwane uzwe izingane zikhala zicela usizo njengoba umlilo ubususha ubuhangu- hangu. Uveze ukuthi okubuhlungu akekho osebenzayo kulo muzi, abazi nokuthi bazothathani bahlanganise nani ukuze bafihle ingane.
“Kwayena ugogo wayo ingane akakwazi ngisho ukukhuluma. Indlela ezithuke ngayo izingane, ngiyacabanga ukuthi ziyakudinga nokwelulekwa ngokwengqondo ngoba uMelokuhle ushe zibuka, kungekho ezingakwenza,” kusho yena.
Ucele noma ngubani ongaba nosizo ukuze bakwazi ukufihla ingane. Okhulumela uMnyango wezokuThuthukiswa koMphakathi kwaZulu-Natal, uNkk Ncumisa Ndelu, uthe bese bezwile ngalolu daba kanti sebeludlulisele ehhovisi labo eliseThekwini.
“Osonhlalakahle bazoya kulo muzi babheke isimo ukuthi sinjani, nanokuthi yiluphi usizo abangalunika umndeni,” kusho yena.
UMnu Msawakhe Mayisela, okhulumela uMasipala weTheku, uthe ezimeni ezinjengalesi, umasipala uyaye uzame ngakho konke okusemandleni ukulekelela umndeni osuke uswele amandla ukuze ufihle ithambo lawo.
“Nakulona lolu daba ngicabanga ukuthi uma kubonakala ukuthi umndeni kawunawo amandla, umasipala uzosondela eduze ukuze umndeni usizakale ukwazi ukungcwaba ilungu lawo ngesikhulu isizotha,” kusho yena.
Okhulumela amaphoyisa KwaZulu-Natal, uLt Col Thulani Zwane, uthe okwamanje amaphoyisa avule idokodo ngokusha komuntu.