Ikusasa likaGigaba lisezandleni zomphathi
ISIZULU sithi ithi ingabankulu ingazekeki. Abadala nxa besebenzisa lokhu kukhuluma, cishe babesuke bebhekise esimeni esifana nesikaNgqongqoshe wezaseKhaya, uMnu Malusi Nkanyezi Gigaba, kulezi zinsuku ogutshuzelwe yizinkinga namahlazo okubonakala kuzomlahlekisela ngesikhundla kwikhabhinethi kuhulumeni kazwelonke.
Isonto eledlule uliqale kabi uMnu Gigaba ngokuba kuputshuke i- video athi wayezenzele yona ngasese, lapho ebonakala ephulula isitho sakhe sangasese, okumfake ehlazweni waba ngundabizekwayo ezinkundleni zokuxhumana, kugiywa ngethambo lakhe. Kusabatshazwa lokho, iNkantolo yoMthethosisekelo inqabile ukulalela isicelo sakhe sokulalela icala, lapho enye inkantolo yayinqume ukuthi wabe esenga ezimithiyo nxa ethi akazange avumele umndeni ocaphuna kusale wakwa-Oppenheimer, ukuba usebenzise ingxenye yesikhumulo i-OR Tambo International, njengendawo ekhethekile yawo yokwamukela amabhanoyi omntakabani.
Ngalo eledlule, uphinde wagqemeka engeqiwa ntwala ngesikhathi uMvikeli woMphakathi, u-Adv Busisiwe Mkhwebane, evumelana nenkantolo ngokuthi okaGigaba waqamba amanga kulolu daba. Ube esenquma ukuba uMengameli Cyril Ramaphosa athathele lo ngqongqoshe izinyathelo ezifanele ukumjezisa, maduze. Naphezu kokunethwa yizinduku ngalolu hlobo, uMnu Gigaba uthi akazimisele ukwehla esikhundleni ngoba ethi akavumelani nesinqumo senkantolo.
Utshele iphephandaba iSunday Times ukuthi kunabambophela amanqina enyathi, abafuna ukuqeda ngaye kwipolitiki. Ushaye phansi ngonyawo wathi ngeke azishiyele yena isikhundla. Ngeshwa lakhe, ikusasa lakhe mayelana nokuthi uyaqhubeka yini aqhoqhobale isikhundla lisezandlani zikaMnu Ramaphosa. Inkinga kaMnu Gigaba kubukeka sengathi ilele ekutheni usejwayele ukuhlala esemafutheni, kusukela esemusha ngenkathi ebekwa ngumengameli osewashiya, uMnu Thabo Mbeki ukuba abe yisekela ngqongqoshe lomnyango wezasekhaya.
Kwathi nxa kungena uMnu Jacob Zuma kwesokwengamela izwe, uMnu Gigaba wakhushulelwa kwesobungqongqoshe, waphathiswa umnyango wezamabhizinisi kahulumeni (public enterprises). Kule minyaka engungqongqoshe, ubesejwayele ukuhola itshe lemali, ukuhlala emizini yombuso kanokusho, ukuhamba ngezimoto eziphambili zikahulumeni, ukuba nonogada ubusuku nemini, ukubala nje eminye yemihlomulo econsisa amathe.
Ukukhishwa kulesi sikhundla kungasho ukuba yilungu lephalamende elijwayelekile, nokulahlekelwa yizizumbulu zemali emholweni asewujwayele.
Inkinga wukuthi ngeke kube lula ukuba athole umsebenzi ezinkampanini ezizimele njengoba esagujutshuzelwe ngamahlazo, esolwa nangokuba nesandla ekusizeni umndeni wakwaGupta ukuxebula umkhomo ezinkampanini zikahulumeni njengeTransnet. Noma kunzima kunjalo, kufanele ungqongqoshe abukele kumkhaya wakhe, uMnu Nhlanhla Nene, azishiyele yena esikhundleni, angaze akhonjwe indlela nguMengameli Ramaphosa.