ABDUL MILAZI
“KE Dezemba boss”, kusho laba abakhuluma isiSuthu uma beqonde ukuthi sidla imali yethu.
Iningi likusho lokhu uma sekusondele yona le nyanga kaKhisimusi, kodwa-ke izitolo zona ziqala ngoMfumfu (October) ukuthengisa izipho zaleli holidi okuthiwa ngelokuzalwa komholi wamakholwa alandela iBhayibheli londlebezikhany’ ilanga.
Phela uZibandlela (December) usuphenduke isikhathi sokuchomela omakhelwane nabangani, lapho labo abathola amabhonasi bekhiphela unyawo labo abangayitholi.
Kuthengwa izimoto zikanokusho, izimpahla ezinamagama futhi uthola umuntu esethenga utshwala sengathi uzoba nomcimbi. Ngikhumbula sisakhula, thina esasiziphumela emindenini edla imbuya ngothi, uKhisimusi kwakuyilona langa elilodwa vo lapho sasidla ukudla okudliwa yilabo ababemi kahle.
Sasithi ukuphumula kancane ekudleni iphalishi nemifino, nathi sidle ilayisi nenyama nalabo ngcamngce abenza lokhu okuthiwa phecelezi yi- twerking uma ubafake ezindishini. Lapha ngikhuluma ngo- jelly no- custard.
Yilapho futhi esasithengelwa khona izimpahla ezintsha zokuswenka. Wawugqokiswa zona bese utshelwa ukuthi ungalinge uzingcolise.
Kwakuba yinkinga-ke uma usufuna ukudlala, uzibone usubukela ezinye izingane zidlala, udamane uvika izintuli nalaba abadlalayo ukuze bangakuthinti ngezandla zabo ezingcolile.
Wawuze ulale ngazo lezi zimpahla ezintsha ngoba ungafuni ukuzikhumula. Phela wawazi ukuthi ngeke uphinde uzigqoke, uzozigqoka kuphela uma kuyiwa edolobheni.
Izingane zazingayi edolobheni ngaphandle-ke uma ziyiswa kwadokotela, okusho ukuthi kwakumele ugule ngempela ukuze uthole ukuqgoka izimpahla zakho ezintsha.
Noma zithengwa lezi zimpahla, wawuthengelwa ezinkulu kunawe ukuze ukhule nazo. Ibhulukwe lalibanjwa lapha emsinsileni, lithungelwe ngaphakathi, uthole amaphakethe lawa asemaceleni esehleli ngemuva ezinqeni.
Lapha ezansi lalifingqwa uthole umphetho usufika emadolweni.
Umphetho-ke wawehliswa njalo uma ukhula, uthole ibhulukwe selimivingqo emine, lapho abantu babebala ngayo ukuthi usuneminyaka emingakhi.
Uma usudlulile uKhisimusi, impilo yayibuyela esimeni esejwayelekile, kudliwe iphalishi neklabishi lomgxabhiso, imifino, umbila nobhatata.
Ongcamngce abatatazelayo sebeyobonwa futhi ngoDecember. Emalokishini lesi kwakuyisikhathi sokuchomela omakhelwane. Wawubona izimoto zasezitolo zefenisha zingena ziphuma, zehlisa osofa, iziqandisi namagumbagumba anhlobonhlobo.
Phela kwakuqhudelwana, kungekho ofisa ukusala, ngisho engenamali. Kwakuthi-ke uma usuqala unyaka omusha, ubone zona lezo zimoto sezilanda yona le fenisha, abantu sebehluleka wukuyikhokhela.
Kuze kube yimanje akukashintshi lutho, umehluko nje wukuthi sekunyuke izinga lokuchoma. Sekuqhudelwana ngezinto ezibiza imali engasuki phansi.
Uthola abantu sebeya emaholidini emazweni akude, babuye bahluleke ukukhokha imali yesikole, sebehluleka nokugcwalisa uphethilomu kulezi zimoto zabo zikanokusho.
Izindawo zemalimboleko zenza imali eshisiwe ukusukela ngoMasingana (January) kuze kuyoshaya uNhlangulana (June). Abanye abantu sebeboleka nangoDecember, bebolekela ukuchoma. Abanye obaba bemizi bathi bangayithola le mali, bese beyanyamalala, bayoze babuye ekhaya ngoJanuary, imali isiqedwe ngama- yellow bone. Bafika ekhaya sebenolaka, befana nenja ekhulekwa ngeketango.
Kunensizwa esasisebenza nayo eminyakeni eminingi edlule, eyayinyamalala njalo ngosuku lokuhola, ize ibuye uma kuqala inyanga.
Inkampani yayithumela abashayeli ukuyoyifuna kwayo, bafike batshelwe ngumfazi ukuthi kayikaze ibuye ekhaya, igcinwe ngosuku lokuhola.
Yaze yagcina isixoshiwe emsebenzini. Bona laba okuthiwa ngama-blesser (obhuti madlisa) bathi badla imali yabo, ibe idliwa yizingane ezincane lezi abasuke bezitenda.
Wona la ma- yellow bone athi adla ubusha bawo, kanti ubusha lobo budliwa ngamakhehla lawa adla imali yawo. Siyasho isisho sesiZulu ukuthi imali yeziwula idliwa yizihlakaniphi.