UPERCY TAU UMINCELE IZEMBE E-ENGLAND
Ufuna ukubuyela kwiBrighton isekwi-English Premiership
UHLALELE ovalweni uPercy Tau ongumgadli weBafana Bafana njengoba iphupho lakhe lisengcupheni yokushabalala.
IBafana ibambane neSuper Eagles yaseNigeria ngo-1-1 kokagroup E wokuhlungela i-Africa Cup of Nations (Afcon) ngoMgqibelo ntambama eFNB Stadium, eSoweto.
Igoli leNigeria kube wumkhonto ogwaze ekhaya kaBuhle Mkhwanazi oyisitobha seBafana, kodwa lacinywa ngelikaLebo Mothiba.
UTau uqokwe njengomdlali ovelele kulo mdlalo njengoba kunguyena onike uqekelele webhola uMothiba wawuvalela enethini. UTau usayiniswe yiBrighton & Hove Albion egijima kwi-English Premiership esuka kwiMamelodi Sundowns ngasekuqaleni kwale sizini.
Ngenxa yemithetho eqinile yokudlala kule ligi yase-England, iBrighton inqume ukumubolekisa kwiRoyale Union Saint-Gilloise edlala kwiFirst Division B eBelgium.
UTau uthi nakuba ekujabulela ukudlala eBelgium kodwa uhlalele ovalweni njengoba iBrighton ibalwa namakilabhu angase agencwe yizembe.
Nakuba isendaweni ka-12 kwilog kodwa kayishiyani kangako ngamaphuzu namakilabhu angezansi kwayo.
“Nakuba ngikujabulela ukudlala eBelgium, kodwa kuyisifiso sanoma yimuphi umdlali ukugijima kwiPremiership yase-England.
"Ngihlale ngithandaza ukuba ikilabhu yami ingagencwa yizembe ngoba ngesizini ezayo kungenzeka ngihambe ngiyodlala e-England.
“Ngihlalele ovalweni ngoba ngifuna ukuyozizwela ubunzima bokudlala kulesiya sigaba. Kangifisi nje iphupho lami lishabalale,” kusho uTau.
Ephawula ngomdlalo weBafana neNigeria, uthe: “Sikwenze konke obekufanele sikwenze ukuze sinqobe lo mdlalo kodwa ngebhadi akwaze kwenzeka. Sihlalele ethembeni lokuthi sizongena kule midlalo ye-Afcon kodwa kubukeka kuzokuba nzima. Nokho kuzofanele ukuba singalilahli ithemba siqhubeke sifuqe.”