Bucishe bachitheka bugayiwe eKokstad
ICISHE yasusa uthuli lwezichwe inkulumo yokuthi eKokstad kayikho inkosi egunyazwe ngokomthetho waKwaZulu-Natal nokuthi iKumkani yamaMpondo, uZanozuko Sigchkgfjkau, bekufanele ibikele iSilo samaZulu, uZwelithini ka-Bhekuzulu uma izonyathela emhlabeni waso.
Lokhu kuvele njengoba iKumkani yamaMpondo ibiyingxenye yomcimbi wabaholi bomdabu, eYouth Centre, eBhongweni, eKokstad, ngoLwesine.
Lo mcimbi ubugqugquzelwe wuMasipala iGreat Kokstad ngenhloso yokuhlanganisa izizwe ezinomlando ngedolobha iKokstad, elisemngceleni weKwaZulu-Natal ne-Eastern Cape, kucotshelelwane ngomlando wobukhosi, kwazise kakucaci ukuthi ngobani amakhosi akule ndawo phakathi kwalaba abazibiza ngawo.
Yize iKokstad ibangwa kakhulu ngamaMpondo namaHiligwa - anomlando onothile ngayo njengoba yaqanjwa ngomholi wayo, u-Adam Kok III - kodwa zikhona nezinye izizwe ezinomlando ngayo. Kulezi zizwe kubalwa amaHlubi, amaXesibe, amaMpondomise, abeSuthu, amaBhaca namaZulu njengoba leliya dolobha lingaphansi kweKwaZuluNatal ngokwemingcele kahulumeni. Zonke lezi zizwe zethule umlando ngabaholi bazo, obuveza ukuthi baxhumana kanjani nedolobha.
ILANGA lingakudalula ukuthi selokhu iNkantolo yoMthethosisekelo ivune iKumkani Zanozuko embangweni wobukhosi bamaMpondo aseQaukeni, isivame ukubonakala emicimbini kaMasipala waseKokstad.
Yinto engafihliwe ukubangwa kweKokstad ngamaMpondo njengoba iKumkani Zanozuko ike yazwakalisa ukungenami kwayo ngokumenywa kweSilo uZwelithini emicimbini yabasokwa eba seKokstad njalo ngonyaka, lapho sifika sinikezwe igunya lokukhuluma “emhlabeni wayo” (iKumkani) kodwa sona sibe singalenza-nga isiko lokusokwa.
NgoLwesine, kawehlanga kahle kwabanye amazwi esikhulu soMnyango wezokuBusa ngokuBambisana nezoMdabu KwaZulu-Natal, uMnu Nathi Mpungose, esethule umbiko oveza ukuthi iKokstad kayinawo amakhosi kepha ngomasipala abangomakhelwano bayo abanamakhosi aziwa nawumnyango.
INkosi yaseMzimkhulu, uLucky Fodo - ngesikhathi inikwa ithuba lokukhuluma - izwakale yeseka umbiko womnyango maqede yazwakalisa ukujabha ngokukhulunyiswa kuqala emcimbini kodwa kukhona iKumkani Zanozuko.
Yiyona iNkosi Fodo ethe iKumkani bekufanele icele eSi- lweni ukunyathela emhlabeni waso ngoba ithi ngokomthetho isilo sicela kwesinye uma sizovakashela indawo yesinye.
UMntwana Andile Matomane (wamaMpondo) akapholisanga maseko, usukume wagxeka iNkosi uFodo nomnyango ngokuvumelana ngokuthi kawekho amakhosi eKokstad kodwa iKumkani Zanozuko ikhona.
Okhulumela iNdlunkulu kaZulu, uMntwana Thulani Zulu, uthe ngeke azifake kulokhu ngoba sinye kuphela isilo KwaZulu-Natal, iKokstad engaphansi kwaso.
USihlalo weNdlu yaBaholi boMdabu KwaZulu-Natal, iNkosi Phathisizwe Chiliza, uthe esifundazweni sabo, iKokstad engaphansi kwaso, kubusa iSilo uZwelithini kaBhekuzulu, futhike naso siyazi ukuthi uma sizohambela eSwazini kufanele iNgwenyama uMswati ikwazi lokho.
Ungoti wezomlando, uDkt Milner Snell, uthe umlando ngeKokstad uveza ukuthi kwakuyindawo eyayinabantu abambalwa, kwazise abaningi babengathandi ukuhlala kuyona ngenxa yamakhaza. Uthe u-Adam Kok III waba ngumholi wokuqala ukufika nabantu bakhe bazakhela isizinda eKokstad ngeminyaka yo-1863. Uthe iNkosi uFaku yamaMpondo yiyona eyanikwa igunya lokuphatha leya ndawo ukusuka eSouth Coast kuya eDrakensburg ngabo-1844.