USHENGE UGXEKE ABEZINDABA
UGXEKE abezindaba uMengameli we-IFP, iNkosi Mangosuthu Buthelezi, ngokubhebhethekisa akubize ngamampunge, ukuthi iMeya yaseZululand, uMfu Thulasizwe Buthelezi, iboshiwe futhi bekulindeleke ukuba ivele eNkantolo yeMantshi yaseMahlabathini ngoLwesihlanu ngodaba lokubulawa kwekhansela, uMnu Sibuyiselo Dlamini.
Lokhu ukusho ngoLwesihlanu esigcawini sabezindaba asibize isigubhukane emcimbini - abeyisimenywa esiqavile kuwona - kaMasipala wasoLundi wokunikezela ngezakhiwo emphakathini.
UMfu Buthelezi naye ubeyingxenye yalesi sigcawu.
“Kungiphethe kabi ukuthi abezindaba bashicilela izindaba zabo ngaphandle kokwenza uphenyo, ukuqinisekisa ukuthi ngabe kuliqiniso yini lokho abakuzwayo noma kungamanga. Ngizizwele ngezami kwiSA FM kufundwa lolu daba, nasoKhozini FM lufundiwe.
“Le nto icace bha ukuthi iphekwe ngabantu abangaphakathi eqenjini lethu, i-IFP. Ngiyazi ukuthi kunamakhansela ethu aphikisana nesiphakamiso sesigungu esiphezulu seqembu esayalela ukuba kumiswe owayeyimenenja kamasipala (waseZululand) uMnu uSB Nkosi, owagcina exoshiwe.
“Ngizwile ukuthi udaba lokuqasha imenenja entsha luzohlala esigungwini sokuphatha umkhandlu ngoLwesibili. Kunamakhansela ethu nezisebenzi ngaphakathi kumasipala abangafuni kuqashwe imenenja entsha. Abantu balindele ukunikwa izidingo-ngqangi zabo, kasikwazi ukulinda imenenja exoshiwe ukuba iye enkantolo,” kusho iNkosi Buthelezi.
“Kungiphethe kabi ukuthi kunohlobo lwabantu abafuna ukucekela phansi isithunzi seqembu ngalesi sikhathi, nami sengifuna ukuthatha umhlalaphansi.
“Kubuhlungu kakhulu kimi. Konke lokhu okwenzekayo yinto ebunjwe ngabantu bethu,” kuphetha iNkosi Buthelezi.
Ikuqinisekisile ukuthi kunencwadi eyitholile ebivela kumuntu ongazivezanga, ebisho konke okubi ngoMfu Buthelezi.
Kuthiwa kunesisebenzi sikamasipala esikhohlwe wukucisha le ncwadi kwikhompyutha yaso ehhovisi, sabanjwa kanjalo.
UMfu Buthelezi uthe yena njengemeya uyaqhubeka nokusebenza ngokujwayelekile.
“Wonke la mahlebezi okuthi ngiboshiwe ngamampunge, njengoba nibonile usuku lonke (ngoLwesihlanu), bengehla ngenyuka ngihambisana nani kuvulwa lezi zakhiwo. Sisazoqhubeka siyi-IFP ukuhambisa izidingo zabantu eZululand ngokwethembeka.
“Yonke le mizamo yokusihlukanisa phakathi ngenhloso yokuphazamisa imisebenzi esiyihambisa emphakathini ngeke ilunge,” kusho uMfu Buthelezi.