Umphakathi udinwe waxosha abazalwane
Bathi kabasamfuni endaweni umfundisi okhohlakele
KUME nse ukukhonza izolo ngeSonto ebandleni lomfundisi wabasindisiwe, iTower of Faith Ministries, eRichmond Farm, eThekwini, ovulelwe amacala okudlwengula amantombazane akhonza kuleli bandla ngesikhathi kugasela amalungu omphakathi abedinwe egane unwabu, aphazamisa abazalwane abebethandaza ngaphakathi.
NgoLwesine ILANGA libike kabanzi ngodaba lwalo mfundisi - esingeke simdalule okwamanje ngezizathu zomthetho - ovulelwe amacala okudlwengula, kwathi ngoLwesihlanu amalungu omphakathi agasela etendeni asontisela kulona alithela phansi, aphihliza nezihlalo.
ILANGA lifika kuleli bandla izolo ngeSonto, amalungu omphakathi abebhekene ngeziqu zamehlo nabazalwane.
Amalungu omphakathi athi kawasalifuni endaweni yawo. Abazalwane bebemi izixongololo eduze kwetende abese belivusile bethi bazama ukusonta kodwa baphazanyiswa.
Abanye babazalwane bese bejika bephindela emakhaya njengoba bese kuyoshaya u-11h00 kungakaqalwa ukusonta. Ngokusho kwelungu lomphakathi elikhulume neLANGA, uNkk Philisiwe Mkhize, sebekhathele yilo mfundisi.
“Le nto yakhe uyiqale ngo2015 kodwa izisulu zangamvulela icala ngoba bezisatshiswa. Sasho nangaleso sikhathi ukuthi kasisamfuni, kodwa imindeni yethu yasatshiswa ngokubulawa, ibhalelwa amaphepha kuthiwa izobulawa uma ike yalibhidliza leli tende.
"Manje njengoba esephindile, ngeke sisathula ngoba sekusicacele ukuthi ufuna ukulala nazo zonke izingane zalapha endaweni,” kusho yena.
Elinye ilungu lomphakathi elicele ukuba singalidaluli igama lalo, kwazise livele linyamanambama, kanti negama lalo lisohlwini lwabebesatshiswa, lithi ngemuva kwezinsongo, belingasakwazi ukuhamba ngokukhululeka.
“Uma siphuma ukuyophuza nomngani wami ebesisatshiswe naye, bese sihlukana ngezindlela, singasahambi ndawonye ngoba besingazi ukuthi laba abasisabisile, basicabangelani.
"Kwesinye isikhathi ngike ngahlangana nemoto emnyama ebengingayiqondi, ngajika ngaphindela lapho ebesiphuza khona ngalinda yaze yahamba,” kusho leli lungu lomphakathi.
Amalungu ebandla ale aphetha ukuphawula ngalolu daba, ethi kawavumelekile ukukhulu- ma izindaba zebandla.
Lapho abemi khona, abezwakala eqinisana idolo ethi amile futhi ngeke anyakaziswe yilutho.
“Hawu! Amanzi amancane lawa! "Sizowawela. Abantwana bakwa-Israel bawela ulwandle lubomvu,” kusho omunye wabo ebaduduza.
Kuthe kusuka, bavele baliqaqa itende abebeligxumekile. Amalungu omphakathi abelokhu ememezile ethi: "Hambani la nilandele umfundisi wese@*$ niyokwenza le kude ukukhohlakala kwenu, hhayi la."
Kuzokhumbuleka ukuthi ngoLwesine ILANGA libike ukuthi amantombazane amathathu ayizisulu, agonyulukile ngemikhuba athi abeyigilwa ngumfundisi.
Enye yawo ithi uyingene ngokuthi uzoba nguyise kuyona, kwazise iyintandane.
Ithe uyiphoqe ukuba imncele isitho sangasese, okuthe uma esechithile, wayiphoqa ukuba isigwinye isidoda sakhe.
Okhulumela amaphoyisa KwaZulu-Natal, uCol Thembeka Mbhele, uthe umfundisi uboshiwe ngemuva kokuvulelwa amacala amane okudlwengula. Uzovela eNkantolo yeMantshi yaseNtuzuma namhlanje ngoMsombuluko. thandeka.ngobese@ilanganews. co.za