UVALWE UKUNGENA KUBO OWOLWENZILO
USETHOLE incwadi embizela enkantolo owesifazane waseLidgetton, eHowick, odube ikubo wayohlala emqashweni ngoba ebalekela umakoti womfowabo osolwa ngokumphoqa yena namalungu omndeni ukuba bazilele ilungu elanyamalala ngo-1994.
ILANGA lithole ngomthombo walo osondelene nalo mndeni ukuthi uNkz Bright Sibisi uthole incwadi emkhomba enkantolo mhla ka-5 ngoZibandlela (December) emuva kokuba ILANGA libike ngoMsombuluko ukuthi uNkk Nikiwe Sibisi, oyinkosikazi yomfowabo, ufuna bazile - yena ubesevele eyigqokile inzilo.
Kulolu daba kubikwe ukuthi lesi senzo siwuhlukanise phakathi umndeni.
UNkk Sibisi, ogane uMnu Sipho Sibisi, oyindodana endala yakulo mndeni, kubikwe ukuthi ngoMgqibelo ubenze umcimbi wokukhumula inzilo abeyalelwe yinyanga ukuba ayigqoke.
Kubikwe ukuthi kulo mcimbi bekulindeleke ukuba imbuzi yomsebenzi iqale iyogqitshwa emathuneni ngaphambi kokuba iyohlatshwa idliwe, obekuwuphawu lokungcwaba leli lungu lomndeni elanyamalala.
Emuva kokuphuma kwalolu daba, uNkz Sibisi uthole incwadi embizela enkantolo, emvimbela ukuba asondele emagcekeni akubo.
“Iyasixaka eyokuthi uBright athole incwadi emuva kokuveza ephephandabeni lolu daba lokuhlukumezeka kwabo. Uyalelwe ukuba angasondeli egcekeni lakubo. Ungaqatshelwa kanjani ukuba uye kini? Sesiyobona ngalo usuku lwasenkantolo,” kusho umthombo.
Ethintwa uNkz Sibisi, uvumile ukuthi ikhona incwadi ayitholile embizela enkantolo.
UMnu Sibisi naye uvumile ukuthi ikhona incwadi ethunyelwe kudadewabo.
“Yebo, sebemfakele incwadi yesivimbelo ngoba ubuye afake amadoda esingawazi lapha ekhaya, okuyinto engalungile. Ngikhuluma nje, ngihlela ukubiza umhlangano womndeni lapho kuzobe kudingidwa khona lolu daba,” kusho uMnu Sibisi.