Sidonsa kanzima esabanokukhubazeka
Singase sivalwe ngenxa yokwentula uxhaso
SIDONSA kanzima isikole sabakhubazekile, iLenge Douglas Special School, esiseMsinga, esiqalwe ngabazali ngoba bebona usizi lwezingane eziphila nokukhubazeka zihlukumezeka emindenini yazo.
Iningi lalezi zingane belikhulekwa ngesisinga uma abazali kukhona lapho befuna ukuya khona, bengazi ukuthi bazozishiya nobani. Ukwakhiwa kwalesi sikole kuthiwa kube wusizo kubazali nakubona abantwana, kodwa manje sisengcupheni yokuvalwa ngenxa yokungalutholi uxhaso kuhulumeni.
Uthishanhloko walesi sikole esiqale ukusebenza ngonyaka odlule, uMnu Thabo Makhunga, uthi siqale ngokusizwa ngesinye isikole esikhona endaweni ngamagumbi amathathu okufundela.
“Siqale ngabafundi abawu-38, kodwa manje isibalo senyukile njengoba sebewu-68. Selokhu siqalile, lesi sikole sifana nesizimele, kasilutholi uxhaso kuhulumeni yize sisibhalisile njengenhlangano engenzi nzuzo. Nakuba sisaqhubeka sisebenza, kube wusizo esiluthole kusomabhizinisi wendawo.
“UMnu Bahle Zondo, ongumnikazi we-Amahle Benefit Scheme neDkt Bahle Zondo Foundation, unikele ngo-R60 000, waphinda wanikela ngemoto yakhe okuyiyona elanda abafundi abahlala kude, ibalethe lapha esikoleni.
“Uyiqashele nomshayeli okhokhelwa nguyena zinyanga zonke. Akagcinanga lapho, ukhiphe olunye uxhaso luka-R100 000 obelusisiza ukuthengela abantwana ukudla njengoba abanye beqhamuka emindenini ehlwempu, bafika esikoleni bengadlanga ngisho iphalishi.
“Nathi singothisha uyasibhekekela ngemadlana ewumholo wanyanga zonke ukuze sikwazi ukuthenga insipho siwashe, sibe bahle uma siya emsebenzini. Ngaphandle kwalolu xhaso, lesi sikole ngabe kade savalwa njengoba usizo sesilucele saze sakhathala emakhanseleni nasemnyangweni (wezemfundo) singalutholi,” kusho uMnu Makhunga.
Uthi ngonyaka odlule uMnu Zondo uke wenzela laba bantwana umcimbi wokubajabulisa, obekukhona kuwo neMeya yaseMsinga, uNkk Buyiswa Ngcobo, ethembise ukuthi izosiza lezi zingane ngevawusha yokuthi zithengelwe ukudla zinyanga zonke, kodwa okungakaze kwenzeke kuze yimanje.
“Size sacela lesi sikole esincike kusona ukuba uma sesipha izingane zaso ukudla, ziphe nalezi zethu. Ngomusa kathishahloko walesi sikole, kuyenzeka lokho. Kuthe uma kufika abohlelo lokuphakelwa kokudla ezikoleni, sacela ukuba nathi basibhekelele ngokudla ngoba iningi lezingane zethu kalikudli ukudla okuqinile.
“Bathe masibhale amagama ezingane esinazo sibanike wona, namanje sisabhekile ukuthi kukhona abazokwenza,” kusho uMnu Makhunga.
UNkk Ngcobo uthe lesi sikole usithembise ukuthi bewumasipala bangasixhasa ngamavawusha izinyanga ezimbili, hhayi nyanga zonke.
“Ngibathembise ukuthi ngizobaxhumanisa nesikole sabakhubazekile, uKukhanyakomsinga, okuncane sikufake kusona ngoba sibhalisile. Yisona-ke ebesesizonika abaseLenge.
“Mhla ka-27 (kwephezulu) sizobe sinomcimbi wabo abakhubazekile, nabo laba bantwana baseLenge sizobabiza sibahlanganise nabaseKukhanyakomsinga, sibenzele umcimbi owodwa ngoba sinenkinga yokuthi kasikwazi ukukhipha uxhaso oluya kubona ngqo bengakabhalisi ngokusemthethweni,” kusho uNkk Ngcobo.
Okhulumela uMnyango wezeMfundo KwaZulu-Natal, uMnu Muzi Mahlambi, uthe ucela iLenge ibhalise ngaphansi komnyango wabo ukuze ithole uxhaso njengezinye izikole.
“Kumela baye esekethe yomnyango wezemfundo eseMzinyathi, bacele ukubhaliswa njengesikole esisemthethweni. Thina kasikwazi ukuxhasa noma yisiphi isikole esingekho ngaphansi kwethu ngoba umngcinimafa ubuza isenti nesenti kwibhajethi asinike yona,” kusho uMnu Mahlambi.
UMnu Zondo, okunguye osaxhase lesi sikole kuze kube yimanje, uthi imfundo yezingane isenhliziyweni yakhe, ngakho-ke ubengeke ahlale asonge izandla esebikelwe ngosizi olubhekene nalaba bafundi.