Ulahlwe ngelakubo "obulale" inyanga
Kuthiwa ubefuna imzalanisele imali "ngesalamuzi"
IKHIPHE isidumbu imali ezalaniswa “ngesalamuzi‚” emuva kokuba owesilisa waseNkobokazi, eMtshezi, kuthiwa udubule wabulala inyanga, wayigqiba ehlathini ngeledlule.
Kubikwa ukuthi umsolwa, okumanje usezitokisini, uxhumane nale nyanga edabuka eMalawi, kodwa ebizinze eNewcastle ngokomsebenzi wayo, ukuba imsize ngokumenzela imali ephindaphindiwe.
Inyanga kuthiwa isuke eNewcastle, amabombo yawabhekisa eMtshezi iyokwenza lo msebenzi. Kubikwa ukuthi ukhokhe u-R1 500 enyangeni, elindele ukuthola imali isiphindaphindiwe, okuyinto okuthiwa yenzekile.
Kuthiwa esinye sezivumelwano zabo bekuwukuthi kuhlukaniselwane le mali.
Umthombo weLANGA uthi inyanga ithe makuyiwe kubo kwalona wesilisa ukuze izoqinisa nomuzi. Yilapho-ke okusuke khona umsindo.
“Uma sizwa, baxabanile endleleni ngoba lona wesilisa ubethi makushiywe imoto obekuhanjwa ngayo, kwazise bekunzima ukuba ifike lapho kuyiwa khona. Ngesikhathi kuxatshanwa, ukhiphe isibhamu wadubula inyanga, ngemuva kwalokho walanda amapiki wayoyingcwaba,” kusho umthombo.
Uthi ukuze kubonakale ukuthi kukhona okushaya amanzi, kusolise ngokuthi le nyanga ibingasatholakali ocingweni lwayo uma ifonelwa ngaba- ngakubo njengoba kade ibatshelile ukuthi iyokwenza umsebenzi eMtshezi.
Kubikwa ukuthi bebebathathu ngesikhathi behamba ngale moto ebiqashwe yinyanga.
“Lona obeshayela imoto ubalekile. Amaphoyisa ahambile ayophenya kwabe sekubonakala ukuthi kukhona okuphathekayo,” kusho umthombo.
Uyise kamsolwa, uMnu Mbongeni Kubheka, uthe akazi lutho ngalolu daba ngoba lwenzeke engekho eMtshezi.
“Yingane yami impela kodwa kayikaze ingitshele lutho,” kusho uMnu Kubheka.
INkosi Xolani Mazibuko, okuyindawo yayo okwehle kuyona lesi siga, ithe akukho ebikelwe khona ngokusemthethweni.
“Ngizwile ngabantu bezikhulumela, bengihlela ukuba simbize umnumzane (Kubheka) azositshela ukuthi yenzeka kanjani into enjena emzini wakhe engasibikeli nakuba kuwudaba olusetshenzwa ngamaphoyisa,” kusho inkosi.
Induna yendawo, uMnu Mkhanyiselwa Nculwane, itshele ILANGA ukuthi izigameko ezifuze lezi sezijwayelekile emphakathini wayo.
“Le nto ihlasimulisa igazi. Sisakhulumile nenkosi ngokuthi sixoxe nomndeni othintekayo kokwenzekile,” kusho uMnu Nculwane.
Okhulumela amaphoyisa KwaZulu-Natal, uLt Col Thulani Zwane, uthe amaphoyisa abophe umsolwa oneminyaka ewu-39 ubudala ngecala lokubulawa kowesilisa wagqitshwa. Uzovela eNkantolo yeMantshi yaseEstcourt maduze.
Ngemuva kwalokho walanda amapiki wayoyingcwaba.