I-EFF IGXEKA UMOTSOALEDI NGOKUCWASA
UZIGXOBE ngetshe kwandawo uNgqongqoshe wezeMpilo, uDkt Aaron Motsoaledi, ngenkulumo yakhe ethi ezinye zezinkinga ezibhedlela zaseNingizimu Afrika zidalwa wukuthi baningi abantu bokufika abazisebenzisayo, abanye babo abangabhalisile kuleli ngokomthetho.
I-EFF ikhwele yadilika kuyena njengoba isho nokusho ukuthi kumele iSAHRC imthathele izinyathelo ngoba inkulumo yakhe ikhombisa ukucwasa abokufika.
Abantu baphawulile ekhasini le-ENCA ngalolu daba:@ht4211: Iqiniso liyabathunuka abantu abaningi baseNingizimu Afrika. Ngelinye ilanga ngiyise ugogo emtholampilo, sama kulayini omude ngendlela emangalisayo.
Iningi leziguli belingenabo omazisi, kuthe ngesikhathi ugogo - oyisakhamuzi sakuleli - esefike phambili, watshelwa ukuthi imithi iphelile. @EllastownH: Masilivume iqiniso njengoba linjalo, amawodi okubeletha ayanyinyitheka ngabokufika, emawodini abalindele ukubeletha kugcwele abokufika, amawodi abhekelela izingane agcwele bona. Ukukha nje phezulu, iziguli eziningi ezibhedlela ngabantu bokufika. @mpha_kane: Kungani abantu belesaba kangaka iqiniso?
Uma uGigaba ehubhuza amanga, kuyinkinga lokho, uma uMotsoaledi ekhuluma iqiniso, nalokho kuyinkinga! Hhayi yimbudane yodwa le. @LukheleSporo: Ungqongqoshe wezempilo akuyena umuntu engimkhonzile, kodwa kulolu daba ngiyameseka, ukhuluma iqiniso elimsulwa, yize nje elikhulume emuva kwendaba.
Imithetho elawula imingcele yenu iwumbhedo wokuqala wokugcina. @MiMoemedi: Laba bantu abalwa nongqongqoshe ngenkulumo yakhe, kabakaze babhekane nesimo esinzima sasezibhedlela zikahulumeni, kodwa babhizi babanga umsindo ongathi shu. UMosoaledi ukhuluma iqiniso. @lindaotapu: Basho ukuthi ungqongqoshe akanalo ilungelo lokukhuluma ngento ethwesa ubunzima umnyango wakhe, kodwa bese silindela ukuthi izinto zenzeke ngendlela efanele kuwona?
Kwa-EFF, lena kakuyona into engacosha ngayo amaphuzu ezepolitiki. @mutaladzi: Yize le nkulumo kangqongqoshe ibuhlungu, kodwa iyiqiniso. @keketso123: I-EFF izosikhulumela imfeketho la. @GodfreyMakhense: Kayikho into ewukucwasa abokufika kulokhu okushiwo ngungqongqoshe. Akushilo kuyiqiniso, masingacashi ngokubandlululwa kwabokufika. @chiliemrama_676: Kulokhu-ke impela ngihambisana nongqongqoshe, i-EFF ayiphole kancane. @sefonkololo: Yiqiniso nje leli, ungqqongqoshe bekufanele aqambe amanga? Hhayi bakithi, i-EFF ayisiyeke phansi. @SiphoTshabala15: Kuyadabukisa ukuthi thina bantu baseNingizimu Afrika sesikhohliswe kakhulu kangangokuba uma abantu bekhuluma iqiniso “siyababethela”.
Kuyiqiniso elingephikwe ukuthi abokufika abangenawo amaphephamvume bathwesa zonke izinhlaka zakuleli umthwalo ongaphezu kwamandla. @lindamasango8: Kayikho into enokucwaswa kwabokufika la, i-EFF ingosomathuba nje abazenza izinto ezikhathalele kakhulu ubu-Afrika. @queenlangelihle: I-EFF ake isichazele ukuthi yikuphi okuwukucwasa abokufika kule nkulumo (kangqongqoshe).