I-PIRATES IQHUBEKILE NOKWENZA I-CHIEFS ITHOFI

UBALISE ngokushalazela ipali kwabadlali bakhe u-Arthur “10111” Zwane ongumqeqeshi weKaizer Chiefs Reserves ehlulwe yi-Orlando Pirates Reserves ngo-10 emdlalweni weMultiChoice Diski Challenge (MDC) izolo ngeSonto ntambama eVosloorus Stadium, eGauteng.

IPirates Reserves yenze umsebenzi ofanayo nowesikwati sayo esikhulu esisanda kuhlula iChiefs ngo-2-1 kowe-Absa Premiership. Nokho-ke iChiefs inethemba lokubuyisa izinduku kwi- semi final yeTelkom Knockout ezokuba ngoMgqibelo eMoses Mabhida Stadium, eThekwini.

UZwane uthi cishe kubabulele ukubhudluza iChippa United Reserves ngo-10-0, ngoba ngemuva kwalo mdlalo amagoli aseyagqoza.

IChiefs Reserves kayidlalanga neze kahle ngesiwombe sokuqala, kodwa ibiphungwa ngezithebe ngesesibili.

UWayne Sandilands obesezintini zePirates Reserves, uqokwe njengomdlali ovelele kulo mdlalo kwazise uvimbe inqwaba yamabhola abethunyelwa yiChiefs Reserves.

USandilands unuka iqaqa kubalandeli beBucs ngemuva kokuvuzisa amagoli awubungane emidlalweni yesikwati esikhulu. Lo nozinti nguyena yedwa oneminyaka engaphezulu kwengu-19 esikwatini seBucs seMDC. Uthi uyalijabulela ithuba lokusebenza nabafana abancane ngoba luningi ulwazi abaluncela kuyena.

IMaritzburg United Reserves inenebule iBlack Leopards Reserves ngo-6-1 ngoMgqibelo eHarry Gwala. AmaZulu FC Reserves ahlulwe ngomkhaya iLamontville Golden Arrows Reserves ngo-2-1 ngosuku olufanayo eVosloorus.

Isiyonke imiphumela yeMDC yangempelasonto ihambe kanje: Chiefs Reserves 0, Pirates Reserves 1; Free State Stars Reserves 1, Celtic Reserves 2; Baroka Reserves 1, Polokwane Reserves 2; Cape Town City Reserves 0, Chippa Reserves 0; Sundowns Reserves 2, SuperSport Reserves 2; Highlands Reserves 1, Wits Reserves 0, Maritzburg Reserves 6, Leopards Reserves 1; AmaZulu Reserves 1, Arrows Reserves 2.