ABESIBHAKELA BATUSE IQHAZA LE-KZN ACADEMY
KUTUSWE iqhaza leKwaZuluNatal Academy of Sports ngokuqeqeshwa kwabaphathi bamabhokisa ngaphansi kweKZN Olympic Style Boxing Organisation okuqhubeka eGlenmore Pastoral Centre, eThekwini.
Lolu qeqesho luqale mhla ka-3 kwephezulu, kanti luzosongwa mhla ka-23 kuyona le nyanga. Abesibhakela sama-amesha bathi babone kungcono bahlomise ngolwazi zonke izinhlaka eziyingxenye yalo mdlalo, kubalwa izimenenja, abaqeqeshi, amajaji onompempe namabhokisa.
Nokho-ke uqeqesho oluqhubeka njengamanje ngolwabaphathi. Lusingethwe ngaphansi kweCulture, Arts, Tourism, Hospitality and Sport Sector Education and Training Authority (CATHSSETA).
USandile Sibisi onguMengameli weKZN Olympic Style Boxing Organisation, ubonge kakhulu i-Academy ngokweseka lolu qeqesho.
“Sibonga kakhulu ku-Aleck Skhosana we-Academy ngokusizwela. Sithole u-R100 000 kwiAcademy osisize kakhulu ukuthwala izindleko zendawo yokulala zonke lezi zinsuku, ukudla nezinto zokuthutha.
"Bekuzokuba nzima ukuqhuba lolu hlelo ngaphandle koxhaso ngoba izifunda ezingu-11 zaKwaZulu-Natal zithumele izithunywa ngazimbili kulolu hlelo.
“Siphinde sasizwa ngabeNational Lottery ngo-R350 000 wezindleko zoqeqesho njengoba kubiza kwabeCATHSSETA.
"Bonke abaqeqeshwayo kumele babuyele ezifundeni benze abebekufundiswa. Kuzomele baphinde babuye balethe imisebenzi yabo bese ithunyelwa eCape Town. Konke lokhu kuzokwenziwa ngoxhaso lwabeLottery.
"Inhloso yethu wukukhiqiza amabhokisa azokwazi ukumela iNingizimu Afrika kuma-Olympic Games nokukhiqizela abesibhakela esikhokhelayo amabhokisa ezinga eliphezulu,” kusho uSibisi.