I-ASA seyicijela imidlalo yaseQatar

UWayde van Niekerk ufakiwe esikwatini

I- ATHLETICS South Africa (ASA) isiziqalile izinhlelo zayo zangonyaka ozayo ukulungiselela imidlalo ye-International Association of Athletics Federation (IAAF) World Championships azokuba ngoMandulo (September) eDoha, eQatar.

I-ASA ngempelasonto ibihlangene nabaqeqeshi, abagijimi nabaphathi babo ibethulela izinhlelo zayo zika-2019. Kulo mhlangano kuvunyelwane ngokuthi bonke abagijimi abazimisele ngokuba yingxenye yemidlalo kazwelonke yangonyaka ozayo, kufanele babambe iqhaza kwiSouth African National Track and Field Championships ejwayele ukuba ngoMbasa (April).

Iningi labasubathi abebeyingxenye yalo mqhudelwano (nonyaka), bawuthakasele lo mhlangano. Bathi bangajabula uma lo mqhudelwano ungaba sezingeni eliphezulu futhi kungabi khona abasubathi abahoxayo. Baqhube ngokuzwakalisa isifiso sabo ngokubona lo mqhudelwano usakazwa bukhoma ukuheha abaxhasi.

I-ASA ikugcizelele ukuthi abasubathi abafuna ukubamba iqhaza emidlalweni kazwelonke kufanele babe yingxenye ye-ASA Championship. Kuthiwa umsubathi ongeke akwazi ukubamba iqhaza kumele kube ngogulayo noma onenkinga yomndeni kuphela.

Umengameli we-ASA, u-Aleck Skhosana, uthe lo mhlangano ababe nawo ubasize kakhulu ukuzwa izimvo zabo nokwazi ukuthi yini abazimisele ukuyenzela izwe.

“Kubalulekile ukuba sihlale phansi sibhunge ngezinto ezithinta ezokugijima nabagijimi. Lokhu kuyasiza ukuba nabasubathi babeke imibono yabo okuzokwenza sisebenze ngokubambisana nangokuzwana,” kusho uSkhosana.

Kulo mcimbi i-ASA imemezele abasubathi besigaba esivulelekile nesamajuniya abazokuba yingxenye yemijaho yangonyaka ozayo.

Kulo mhlangano i-ASA imemezele isikwati okulindeleke ukuba isebenzele phezu kwaso ngonyaka ozayo, sesisonke simi kanje: u-Akani Simbine, u-Anaso Jobodwana, u-Antonio Alkana, uBenedict Moeng, uClarence Munyai, uCornel Fredericks, uDerrick Makaleng, uDesmond Mokgubu, uDuane Fortuin, u-Elroy Gelant, u-Emile Erasmus, uHenricho Bruntjies, uKhotso Mokoena, uKyle Blignaut, uLebogang Shange, uLe Roux Hamman, uLuvo Manyonga, uLuxolo Adams, uNcincili Titi, u-Orazio Cremona, uRoscoe Engel, uRuan de Vries, uRuswahle Samaai, uRynardt van Rensburg, uSimon Makagwe, uSokwakhana Zazini, uStephen Mokoka, uThando Dlodlo, uThapelo Phora, uVictor Hogan, uWayde van Niekerk, uZark Visser, uCarina Horn, uCassidy Williamson, uCaster Semenya, uCharne Bosman, uChristine Kalmer, uDominique Scott, uGlenrose Xaba, uJustine Palframan, uNolene Conrad, uRekenette Steenkamp, uSunette Viljoen, uTebogo Mamathu, uWenda Nel, uZeney van der Walt, uGerda Steyn, uTamzin Thomas no-Alyssa Conley.