UJATSHULISWA WUKUQINA KOKHAKHAYI KUMABHOKOBHOKO
UNCOME indlela abazinikela ngayo abadlali bakhe uRassie Erasmus ongumqeqeshi wamaBhokobhoko abhuquzise iScotland ngo-26-20 koweCastle Lager Outgoing Tour ngoMgqibelo kusihlwa eMurrayfield, eScotland.
Elakuleli liye kulo mdlalo lihambela phezulu emuva kokuguqisa iFrance ngo-29-26 ekuhambeni. Kuyiwe ekhefini elakuleli lihamba phambili ngo-20-17 kwiScotland.
“Abadlali bakhombisa ukuzimisela okuyisimanga okwenza izinto zibe lula kithina njengabaqeqeshi. Siyakhula umdlalo nomdlalo, indlela esinqoba ngayo ikhombisa ukuqina kokhakhayi kubadlali njengoba sebekwazi ukuvikela imiphumela abayitholayo.
“Kuhle ukubona abadlali esibanika ithuba belibamba ngezandla zombili okusiqinisa idolo ngokuba neqembu eliqinile nxa zonke.
"Kuyajabulisa ukubona abadlali belandela imiyalelo yethu engikholwa wukuthi yikhona okwenza sibe nempumelelo esinayo okwamanje.
"Ngibonga ukubambisana okukhona phakathi kwethimba labaqeqeshi nabadlali, indlela okwe- nzeka ngayo eqenjini iyamangalisa. Kunobumbano oluyisimanga,” kusho u-Erasmus.
Nokho lo mqeqeshi kufanele azishaye isifuba ngendlela ahlanganise ngayo iqembu lakhe njengoba liqhubeka nokuthola imiphumela emihle ngaphansi kobuholi bakhe.
U-Erasmus ufike izinto zimapeketwane kuleli qembu ebeliqeqeshwa ngu-Allister Coetzee osule ekuqaleni konyaka ngenxa yokuphikwa yimiphumela.
Umdlali wakuleli osemncane, u-Embrose Papier, ube nomdlalo omuhle kwazise bekungokokuqala eqala umdlalo emuva kokuba uFaf de Klerk ekhululiwe ukuba abuyele ekilabhini yakhe.
UHandre Pollard uqhubekile nokugila izimanga okwenze waqokwa njengomdlali wosuku.
Umdlalo olandelayo welakuleli lizowugijima neWales ePrincipality Stadium okuzokube sekungowokugcina walolu chungechunge lwemidlalo.
Khonamanjalo, i-Ireland iguqise iNew Zealand ngo-16-9 okube wumphumela oshaqise abaningi ngempelasonto. Izinto zibukeka zinzima kwiNew Zealand njengoba nangeledlule ibuye sekuvalwe amehlo ibhekene ne-England.