Bagaqele oweBucs onyiwa yisikimu

I-Iron Duke yenqabile ukuphawula

ULUVUYO “Amigo” Memela osephenduke ifenisha kwi-Orlando Pirates ugaqelwe ngamakilabhu amaningi agijima kwiAbsa Premiership.

Nakuba iBucs iyiqale kahle le sizini njengoba ithola imiphumela egculisayo kodwa kunabadlali bayo abathwele kanzima njengoba isikimu besizwa ngendaba.

Lokhu kudalwe wukufika kwabadlali abasha abayibambe kahle njengoba kuyiyona eqhwakele esicongweni se- log ye-Absa Premiership.

Leli phephandaba lithole ukuthi uMemela odlala ophondweni lwesokunxele kwiBucs, ufunwa uthuli ngamakilabhu adlala kulesi sigaba.

Phakathi kwamakilabhu okuvela ukuthi amugaqele kungabalwa iMaritzburg United neCape Town City. Kuthiwa iCity ikhuluma ngqo noSihlalo weBucs, u-Irvin Khoza, ngenhloso yokuba abadedelele lo mdlali.

UMemela uzithola esekhuhla ibhentshi nje, ngesizini eyedlule isikimu bekungesakhe, eshaya namagoli amqoka.

Leli phephandaba lishayela uKhoza izolo ngeSonto ekuseni ukuthola ukuphawula kwakhe ngalolu daba, uthe ngeke akwazi ukukhuluma ekhala ngokuxineka.

Nokho kubukeka kuzokuba nzima ukuthi iPirates imdedele lo mdlali njengoba isazobhekana noxhaxha lwemidlalo eyahlukene.

Izogijima iTelkom Knockout, kube eyeligi bese kuba ngeyeCaf Champions League. Iphumele obala ngokuqala kwesizini ukuthi ifuna kube khona izicoco ezinqobayo. Iphinde yaqinisekisa nokuthi ifuna ukuhamba ibanga elide kwiChampions League.

Le kilabhu izokuba nomdlalo obucayi neKaizer Chiefs we- semi final yeTelkom Knockout ngoMgqibelo ngo-15h00 eMoses Mabhida Stadium, eThekwini.

Ubumqoka balo mdlalo bucaciswe nawukudayiswa kwawo wonke amathikithi awo kusaphele amahora amabili nje kuphela esemakethe.