ITSHE LIMI NGOTHI KU-BAXTER
ITSHE limi ngothi kuStuart Baxter ongumqeqeshi weBafana Bafana njengoba kuvela ukuthi izembe lilenga entanyeni.
IBafana iphinde edume ngakho iphoxa abantu baseNingizimu Afrika ibambana neSuper Eagles yaseNigeria ngo-1-1 koka-group E wokuhlungela i-Africa Cup of Nations (Afcon) ngoMgqibelo ntambama eFNB Stadium, eSoweto.
INigeria yiyona evule inkundla ngesikhathi uBuhle Mkhwanazi oyisitobha seBafana elihlohla ngakubo, kodwa ihlazo lagqitshwa yigoli likaLebo Mothiba aliphaselwe nguPercy Tau.
Leli phephandaba lithole ukuthi uMengameli weSouth African Football Association (Safa), uDanny Jordaan, uzwakalise ukungenami ngalo mphumela weBafana.
Kuthiwa uma elakuleli lihlulekile wukungena kwi-Afcon ezokuba ngonyaka ozayo eCameroon, izinyawo zizogcwala udaka kuBaxter.
Kuthiwa emuva komdlalo, uJordaan uzwakalise ukungenami ngoBaxter. IBafana ukuze ingene kule midlalo ye-Afcon kufanele ihlule iLibya ekuhambeni kowo- kugcina ka-group E ozokuba ngoNdasa (March).
ILibya ihlule iSeychelles ngo-8-1 ekuhambeni ngoMgqibelo ntambama kowokuhlungela yona le midlalo. UBaxter uthi ithuba lokuya kule midlalo lisekhona.
“Ithuba sisenalo lokuya kwi-Afcon ngakho-ke kakuphelile ngathi. Lo mdlalo weNigeria besingawunqoba, sizenzele thina phansi saphinda sabapha negoli.
"Ngiphoxekile ngomphumela kodwa-ke kuyangijabulisa ukuthi sithole amaphuzu amane kwiNigeria,” kusho uBaxter.
IBafana kuzokuthi kusasa ngoLwesibili ngo-19h00 ibhekane neParaguay koweNelson Mandela Challenge eMoses Mabhida Stadium, eThekwini.
UBaxter uthi bawuhlonipha ngendlela eyisimanga lo mdlalo futhi bazokuqinisekisa ukuthi bayawunqoba.
“Lo mdlalo ngowokuhlonipha iqhawe lomhlaba wonke, ngakhoke kufanele siwunqobe. Lo mdlalo uzophinda usinike ithuba lokubona abadlali abathile.
"Engikucelayo nje kubantu baseNingizimu Afrika wukuba baphume ngobuningi babo ukuzokweseka iqembu lesizwe ngoba lo mdlalo umqoka,” kusho uBaxter.