Usenonogada uRobbie Jr

Uthi ugadwa ngoba ebaluleke kakhulu

IYAQHUBEKA nokuba ngunontandakubukwa indodana kaRobbie Malinga (ongasekho) owayengumculi, enguprojusa, njengoba isabalalise i- video yayo kwi- Instagram imemezela ukuthi isinonogada.

URobbie Malinga Jr (17) ufake le video ebonakala khona eyongena emotweni engungwe ngonogada. Kuyona uzwakala ebiza la madoda akhulile ngabafana. Ube esengena emotweni bese evula kakhulu umculo, aphume emotweni sakudansa.

Uzwakala ethi: “Ngihlale nginonogada ngoba ngingumuntu obaluleke kakhulu, ngakho kubalulekile ukuba ngihlale ngiqashiwe”.

Ubuye wathi ngisho eya esikoleni, lapho enza khona uGrade 10, bayahlala bamlinde ngaphandle kuze kuphume isikole.

Lo nontandakubukwa, obuye azibize ngoRob Mal, uqale ukugqama kakhulu ngemuva kokushona kukayise ngoNhlaba (May) nonyaka ngesikhathi esebenzisa ikhasi likayise le- Instagram efaka izithombe, echoma ngezimpahla zikayise okubalwa kuzo izimoto zikanokusho nezokugqoka ezibizayo.

Ngaleso sikhathi wayevamise ukusho amazwi athi, “It’s too much” okwagcina kuholele ekusabalaleni kwezithombe zakhe sezenziwe ihlaya kulezi zinkundla.

Lokhu kuchoma nokuthanda ukubukwa kumenze wangena ohlwini lweDrama Queen of the Year kwiFeather Awards ebingoLwesine olwedlule, eGoli.

Kolunye uhlelo lukamabonakude, obelusakaza bukhoma kulo mcimbi wezindondo, lo mfanyana ubebanjelwe umbhobho futhi imibuzo ibiqale ibhekiswe kunogada yena ayidlulisele kuRobbie Jr ukuba aphendule.

Okunye akuvezile wukuthi kukhulu eza nakho ngonyaka ozayo okuzonyakazisa iNingizimu Afrika, okunezinsolo zokuthi ukhuluma ngohlelo lwempilo yakhe oluthi, “It’s Too Much.”