THANDI ZONDI
IMVAMISA abantu abaningi banyukelwa yisisindo ngesikhathi samaholide kaDisemba ngoba badla kakhulu futhi bavilaphe nokuzivocavoca. Cishe wonke umuntu usuke enganakile ukuthi uhlobo lokudla akufaka emlonyeni kunempilo yini ngalesi sikhathi sonyaka ngoba abantu basuke begxile ekutheni kumele bazithokozise, badle izibiliboco.
Kakushiwo ukuthi ungazithokozisi kepha kufanele uzithokozise ngokuzikalela, ungakhohlwa wukudla ukudla okumnandi kodwa okunempilo.
AMATHIPHU ANGAKUSIZA UZIGCINE UNEMPILO:
Qhubeka nendlela yokuzinakekela obuyisebenzisa: Ukuthi usemaholidini kakusho ukuthi ungazinakekeli. Uma kungukuthi ujwayele ukuphuza amanzi anolamula ekuseni, ungayeki ngoba nakhu kungamaholide.
OKUHLAZA
Uma ubona ukudla okuluhlaza emcimbini ( greens) ungakuyeki, kudle. Qinisekisa ukuthi udla izinto eziluhlaza njalo ngosuku. Uma kungukuthi uvuka nge- smoothie, zama ukuthi ushintshe wenze i- green smoothie. Ukudla okuluhlaza kukhuculula umzimba.
UNGAYI EMCIMBINI ULAMBILE
Uma kunomcimbi ozoya kuwo yidla into ezohlala esiswini, ikakhulu uma uya emcimbini ogcwele amafinger snack. Kulungile ungakudla konke kodwa yidla ukudla okunama- protein ngaphambi kokuya emcimbini ukuze ungadli ngokweqile.
PHUZA AMANZI
Kwesinye isikhathi sike siphambanise indlala nokoma. Ukuphuza amanzi kuzosiza isikhumba ukuthi sihlale sichachambile. Zama ukuphuza u-3 litre ngosuku.
UBANI ONENDABA UKUTHI UDLA KAKHULU YINI?
Ukudla kakhulu kungakukhathazi, phela ngamaholide vele, kulungile ukuba uzithokozise uma uthola isikhathi kodwa ungakwenzi kube wumkhuba wansukuzonke lokho. Uma kungenjalo uzozizwa uqunjelwe futhi ukhathele.
ZIVOCAVOCE EKUSENI
Ngaphambi kokuba usuku luqale nezinhlelo zalo, zama ukuzivocavoca ekuseni. Udinga imizuzu engu-20 njalo ngosuku yokuzivocavoca. Uma uthanda ungahamba ebhishi, uzilule noma ujime ekhaya - akufani nokungenzi lutho.
ZINAKE
Qinisekisa ukuthi uqhubeka nezinhlelo zokuzinaka nokuzithanda. Mhlawumbe ungumuntu othanda uku- meditator noma ukwenza iyoga, qhubeka nokwenza lokho ukuze uzizwe ungumqemane futhi uphilile nasemphefumulweni.
Ukuthi izingane zisemaholideni kakusho ukuthi shintsha indlela owenza ngayo izinto. Izingane mazingabi yisizathu esikwenza ukuba ungazivocavoci.